Qendra e Botimeve për Diasporën ka nisur paraditen e sotme në Tiranë aktivitetin dy ditor “Shqipja në diasporë”. Një takim ndërkombëtar për të diskutuar jo vetëm mbi gjuhën shqipe por ruajtjen dhe te ardhmen e saj sidomos në komunitetet shqiptare që jetojnë jashtë Shqipërisë. Të pranishëm në sallë dhe on line shumë mësues të gjuhës shqipe në Diasporë, gjuhëtarë, studiues dhe përfaqësues të lidhjes së mësuesve të Diasporës, të organizatave dhe shoqatave shqiptare në Diasporë.
Në fjalën e saj përshëndetëse drejtoresha e Qendrës së Botimeve për Diasporën, Znj. Mimoza Hysa tha se Qendra e Botimeve për Diasporën duke kuptuar rëndësinë e misionit të saj për mbështetjen e mësimit të gjuhës shqipe në Diasporë përmes botimit të teksteve shkollore dhe materialeve ndihmese e ka vlerësuar si domosdoshmëri për të pasur sukses në misionin e saj bashkëpunimin e ngushtë ndërinstitucional dhe ndërshtetëror. “Vlerësoj bashkëpunimin me Ministrinë e Arsimit të Shqipërisë dhe të Kosovës, me Ministrinë e Punëve të Jashtme dhe përgjegjëse për diasporën si në Shqipëri dhe po ashtu në Kosovë por mbi të gjitha vlerësoj bashkëpunimin me shkollat, kurset, programet e gjuhës shqipe dhe në veçanti me shoqatat, organizatat dhe lidhjet e mësuesve që zhvillojnë tashme prej dekadash një punë fisnike në Diasporë” u shpeh znj. Mimoza Hysa duke falenderuar specialistët e mirënjohur të arsimit të dy ministrive të arsimit të Shqipërisë dhe të Kosovës. “Të cilët kanë ndihmuar në rrugëtimin e QBD-së dhe që kanë hapur para nesh një rrugë të suksesshme, që me miratimin e kurrikulës së përbashkët apo me seminarin 15 vjeçar tashmë që zhvillohet mes dy vendeve.
Në katër panelet e takimit studiues, gjuhëtar, mësues të gjuhës shqipe, dhe ekspertë do të diskutojnë për tematika si “Rëndësia e teksteve mësimore bazë dhe plotësuese për mësimdhënien në diasporë”, Roli i katedrave, departamenteve, programeve mbi gjuhën shqipe në botë dhe ndihmesa e tyre në njohjen dhe përhapjen e kulturës shqiptare, Shembuj suksesi dhe risi në mësimdhënien e gjuhës shqipe në diasporë.
Aktiviteti do të vazhdoje ditën e nesërme në hotel Koloseu në qytetin e Shkodrës ku diskutimet do të kenë në fokus letërsinë dhe krijimtarinë në gjuhën shqipe në diasporë.
