Projekti “Albania letteraria” dhe media “Albania news” do të jenë të pranishme në Panair librit në Tiranë 2022, me stendën e vet përfaqësuese, të sponsorizuar nga Ambasada Italiane në Tiranë dhe nga Ambasada Shqiptare në Romë dhe në bashkëpunim me Qendrën e Botimeve për Diasporën.
Më datë 17 Nëntor në orën 19.00, “Albania letteraria” në bashkëpunim me Qendrën e Botimeve për Diasporën prezanton librin “Legjendat Shqiptare Tregime të moçme shqiptare” të Mitrush Kutelit – botuar në version dygjuhësh nga Redaksia për Diasporën (Qendra e Botimeve për Diasporën). Të pranishëm në stendë do të jenë Mimoza Hysa, drejtoreshë e QBD, Dhurata Shehri, Departamenti i Letërsisë, Universiteti i Tiranës, Renata Martini, Departamenti i Gjuhës Italiane, Universiteti i Tiranës Pandeli Pasko, i biri i Mitrush Kutelit si dhe Tom Kuka, shkrimtar.
Aktiviteti do të moderohet nga Anna Lattanzi, kritike letrare – Albania letteraria.
Albania letteraria është një projekt jofitimprurës dhe totalisht vullnetar, i cili lindi nga ideja Olti Buzit, ish-drejtor i lajmeve Albania news, i dedikuar tërësisht letërsisë shqipe, pra shkrimtarëve të përkthyer shqiptarë, autorëve italishtfolës dhe italianëve që tregojnë për Shqipërinë.
Gazeta “Albania letteraria” është një realitet unik në Itali, i cili mbledh recensione, artikuj kritikë letrarë, intervista dhe rubrika të ndryshme, me synimin që të krijoje një urë letrare mes dy vendeve dhe për të nxitur përhapjen e letërsisë shqipe në Itali.
“Gjatë qëndrimit tonë në Panair do t’ju njoftojmë nëpërmjet kronikës së përditshme, për ngjarjet më të rëndësishme të eventit, intervista dhe artikuj nga më të ndryshmet, me synimin për ta sjellë eventin sa më shumë në Itali, duke e bazuar prezencën në parimin që pasqyron realitetin tonë që nga fillimi: të bëjmë të njohur dhe të mbështesim përhapjen e kulturës letrare shqipe në Itali, në të gjitha format e saj”, thuhet në njoftimin për media
