Stacey Silva personazhi i njohur i emisionit televiziv amerikan ’90 Day Fiancé’  dhe djali shqiptar Florian Sukaj janë martuar ditën e enjte në Connecticut.

Përpara se të bëheshin të njohur për publikun amerikan Silva dhe Sukaj janë njohur në Instagram. Më pas u bënë pjesë e reality show-t i cili ka në fokus çifte, ku një partner jeton jashtë Amerikës dhe tjetri është shtetas amerikan. Emisioni ndjek gjithë procesin e vizave K-1 e njohur ndryshe edhe si viza e të fejuarit. Viza i mundëson të fejuarit nga një vend i huaj të udhëtojë në SHBA për të jetuar me bashkëshorten e tij/saj të ardhshme amerikane. Qëllimi i vizës K-1 është t’i sigurojë çiftit kohë për të bërë marrëveshje dhe për të kryer një ceremoni martese. Çdo çifti duhet të nënshkruajë dokumente që deklarojnë qëllimin e tyre për t’u martuar si pjesë e procesit të vizave. Nëse çifti nuk lidh martesë brenda 90 ditëve, përfituesi duhet të largohet nga vendi. Çifti mund të përballet me barriera gjuhësore, tronditje kulturore, stigmë për t’u menduar si “nuse me porosi” dhe skepticizëm nga miqtë dhe familja.

Kjo është martesa e tyre e dytë pasi për herë të parë u martuan në prill të vitit 2020 në një ceremoni të vogël ku të pranishëm ishin ata të dy dhe nëpunësi civil.

“Ky është momenti që ne kemi pritur,” thotë Silva, 48 vjeç, për PEOPLE. “Ne kemi qenë së bashku tetë vjet dhe kemi kaluar shumë dhe dashuria jonë ka mbijetuar. Ne jemi këtu tani. E bëmë. Të themi betimet tona para familjes dhe miqve, është befasuese.”

Nusja kishte veshur një fustan të realizuar me porosi nga stilistja shqiptaro-amerikane Katerina Bocci. “Fustanet e saj janë shumë të modës së lartë”, thotë Silva. “Ajo sapo bëri realitet fustanin tim të ëndrrave. Është fustani më i bukur dhe spektakolar që mund të kisha ëndërruar ndonjëherë.”