Në qytetin Yonkers, të qarkut Westchester të New York-ut , më 13 Tetor 2022, ligjëvënësi, Z. David Tubiolo, organizoi eventin “Octoberfest” (Festa e Tetorit), me praninë e residentëve të këtij qyteti. Ky aktivitet që ruan dhe promovon traditat e popullit gjerman, festohet jo vetëm në komunitetin gjerman, por në të gjithë Shtetet e Bashkuara të Amerikës si edhe më gjerë.
Festa e ka zanafillën e saj, në vitin 1810. Ajo u festua për herë të parë në Mynih, të Gjermanisë. Në këtë festë konsumohet birrë e prodhimit gjerman si edhe ushqime të ndryshme tradicionale.
Shoqata Shqiptare – Amerikane “Skenderbej” Inc, mori pjesë në këtë aktivitet të komunitetit Amerikan. Ishin të pranishëm kryetari i shoqatës, z. Imer Laçaj, ish kryetari Z. Mark Qehaja, anëtarja e kryesisë së shoqatës znj. Arta Xhaferri si edhe anëtarë të tjerë të kësaj shoqate, z. Blerim Gjocaj , z. Elton Xhaferri si edhe znj. Adelina Laçaj. Mori pjese edhe historiani i njohur, MSc. Agim Aliçkaj si edhe shumë shqiptarë të tjerë, banues të zonës se Yonker-sit dhe të Bronx-it. Pjesëmarrja e aktivistëve, shoqatave, banorëve të ndryshëm në këtë festë tradicionale gjermane, e bëri edhe më të larmishëm aktivitetin. Ata patën rastin të shkëmbejnë mendime në biseda të lira, marrin informacione, shkëmbejnë karta biznesi duke krijuar kështu, një mundësi te re për lidhjen e shqiptarëve mes njëri tjetrit si edhe pjesëmarrjen e tyre më të gjerë në aktivitete të ardhshme.
Ligjëvënesi i Yonkers-it, zoti David Tubiolo, është i njohur si simpatizant dhe përkrahës i komunitetit Shqiptar. Ai ka marrë pjesë në shumë aktivitete të organizuara nga shoqata të ndryshme shqiptare të diasporës si edhe ka mbështetur vazhdimisht shoqatën Shqiptare Amerikane “ Skenderbej” Inc., me prezencën e tij, në aktivitete të saj.
Në fjalën e tij, zoti Tubiolo, falenderoi të pranishmit për pjesëmarrjen. Ai ndër të tjera theksoi se “Ne duhet të kemi më shumë takime të tilla, që jo vetëm të konsumojmë birrë, (pohoi duke qeshur ligjëvënësi me humorin që e karakterizon) por edhe të diskutojmë dhe të njohim problemet e qytetarëve.” Bisedat e ngrohta me pjesëmarrësit nga komunitete të ndryshme të New York-ut, trokëllimat e gotave të birrës së shijshme gjermane, e bënë aktivitetin shumë çlodhës, argëtues, informativ, interesant dhe mbresëlënës. Ai kaloi në një atmosferë shumë familjare.
Në fund të këtij aktiviteti , pjesëmarrësit dhuruan disa fonde për ligjëvënësin, Z.Tubiolo, në ndihmë të sponsorizimit të aktiviteteve të tjera, si edhe për karrierën e tij ligjëvënëse, në shërbim të komunitetit të Westchestër dhe popullsisë së New York – ut në tërësi z.Tubiolo, i urojmë suksese si ligjëvënës, në karierën e tij.
***
Marrë nga Shoqata Shqiptare – Amerikane “ Skenderbej” Inc
