Lidhja e Gruas Shqiptare në Greqi ( Ένωση Αλβανιδων Γυναικών στην Ελλάδα) ka ccelur fushatën dy javore për Dhurimin e Gjakut, në kuadër të mbështetjes konkrete të Tetorit Rozë, muaji i sensibilizimit të grave në luftën kundër kancerit të gjirit.
Fushata fillon nga dita e sotme 10 tetor dhe do të vazhdojë deri më 23 Tetor.
“Një muaj simbolik si ky duhet të bëhet më kuptimplotë me ndihmë reale, jo vetëm me mesazhe sensibilizuese. Lidhja jonë nëpërmjet Bankës së saj të Gjakut ju ka ardhur në ndihmë deri tani 14 grave emigrante shqiptare ” tha për Diaspora Shqiptare, znj. Mirjana Hasalla kryetare e Lidhjes së Gruas Shqiptare në Greqi ( Ένωση Αλβανιδων Γυναικών στην Ελλάδα) duke ftuar të gjithë emigrantët shqiptarë me banim në Greqi, që kanë dëshirë ti bashkohen kësaj nisme humanitare
Për të dhuruar mund të drejtoheni në çdo spital shtetëror në qytetin ku banoni të gjitha ditët e javës, me dokumente identifikimi dhe Amka.
Mund të dhurojnë gjak personat nga mosha 18-60 vjeç që gëzojnë shëndet të plotë.
“Kjo është një dhuratë që ju, ju bëni jetëve të të tjerëve, një vepër humane e njerëzore, duke përcjellë gjithashtu edhe një mesazh të bukur njerëzore. Të shpëtoni jetë njerëzore është madhështore”, përfundon Hasalla.
