Zëvendës ministrja e Punëve të Jashtme dhe Diasporës së Kosovës në fjalën e saj në Samitin e tretë të Grave të Diasporës e vuri theksin tek fuqizimi i rolit të gruas në sferën publike. Gashi u shpreh se migrimi është një sfidë globale por në rastin e vendeve tona është një sfidë që mund të kalohet duke bashkëpunuar ngushtë me gratë në Diasporë. Pasi sipas saj janë gratë e Diasporës mentoret më të mira për gratë në vendin e origjinës, në mënyrë që ato të punojë të realizohen dhe të ndërtojnë të ardhmen ne vendin e tyre e jo duke u larguar.
Fjala e plotë:
Është nder, kënaqësi dhe privilegj të jem në mesin tuaj, por mbi të gjitha të flasim për një temë e cila lidhet me rolin shumë aktiv të gruas shqiptare jashtë vendit. Angazhimi i përbashkët për avancimin e rolit të gruas është shumë i rëndësishëm por statistikat në terren na flasin ndryshe. Dhe shtrohet pyetja sim und ti përmirësojmë ato? Në kuadër të rrugëtimit tonë vazhdimisht tentojmë të ngremë rolin e gruas dhe të flasim për gruan në politikëbërje, gruan në biznes. Mirëpo në këtë rrugëtim gratë kanë sfida të pafundme. Unë shpresoj shumë që këtë samit të grave të Biznesit të Diasporës ta shfrytëzojmë për të bashkëbiseduar për sfidat që i kemi para e që në radhë të parë ndoshta ndonjëherë sfida kryesore e gruas shqiptare është gruaja vetë. Është gruaja shqiptare që ka dyzimin majtas apo djathtas, por edhe gruaja shqiptare që shumë pak në disa raste tenton të afrojë gruan tjetër. Kështu që në këtë rrugëtim mendoj që duhet bashkëbiseduar mes nesh, për të gjetur një alternativë se si mund të kalojmë këtë stad shoqëror dhe gratë të tentojnë ti ndihmojnë më shumë gratë. Pjesa tjetër më tej lidhet me rolin e patriarkut, që në këtë sistem vazhdimisht avancon, por nuk avancon me hapat që unë do të doja ta shihja. Ne harrojmë që kemi shumë gra jashtë tregut të punës, kemi shumë gra jashtë sistemit të edukimit arsimor, kemi shumë gra jashtë politikbërjes e jemi të dominuar nga burrat. Dhe ky dominim i burrave në sferën publike jep një lloj disbalance. Kjo nuk është ndonjë sfidë që nuk tejkalohet, sepse mendoj që kemi shembuj të shumtë të tejkalimit të kësaj sfide. Por ky tejkalim duhet po ashtu të shndërrohet në një mekanizëm i cili është trajnues, për kalimin e ekspertizës nga një grua te një grua tjetër, ose mentorimit. Mendoj që sfida kryesore e grave është të gjejnë mentoret e përshtatshme të cilat i ndihmojnë që ato ti tejkalojnë sfidat që ato kanë para. Në këtë drejtim e shoh si një avantazh të madh angazhimin e gruas të Diasporës, ose gruas shqiptare që jeton në Diasporë në inkuadrimin e politikbërjes tonë ose në inkuadrimin e projekteve të ndryshme që bëhen në Kosovë e në Shqipëri e në rajon në përgjithësi.
Për faktin që ato sjellin jo vetëm një ekspertizë, por sjellin edhe një eksperiencë të bujshme në rrugëtimin e Diasporës shqiptare. Por shumica e mërgatës tonë është e vendosur në vende kryesish shumë demokratike. Marrim psh Gjermaninë Zvicrën SHBA, kryesisht aty graviton Diaspora jonë, në Itali e Greqi. Kështu që në këtë drejtim këto gra ballafaqohen me një sistem i cili është shumë më i avancuar sesa sistemi i vendit të origjinës. Dhe në këtë drejtim unë pres që gratë të kanalizojnë ekspertizën, eksperiencën, transferimin e njohurive në kuadër të sistemit që kemi, në të njëjtën kohë pres që ato të punojnë bashkërisht me gra të vendit të origjinës. Jo për ti ofruar atyre për të dalë jashtë vendit, sepse kjo është sfida tjetër që kemi hasur, po për ti mentoruar dhe për të menduar për të krijuar, bashkëkrijuar diçka në këto vende. Nëse ka një lokacion edhe nëse ka një popull që ka kaq shumë dashuri, bujari edhe mikpritje jemi ne shqiptaret. Por nëse gjithashtu ka një vend i cili në momentin e parë që gjen mundësinë thotë unë kam biznesin shumë të mirë, jetën shumë të mirë por do të doja të dilja jashtë vendit, jemi po ashtu ne. Kështu që unë mendoj që në këtë samit, bashkë me ju të reflektojmë mbi rolin e ikjes së trurit që e kemi të vazhdueshëm. Kjo është një sfide e cila nuk është vetëm e Shqipërisë, Kosovës apo Ballkanit. Kjo është sfida globale. Në këtë rrugëtim vendi jonë ka nevojë për njerëz të rinj, ka nevojë për hapësire, për fuqizim të rolit të njerëzve të rinj. Jo vetëm për njerëz në politikë bërje, por edhe njerëz në sektorin privat ku zëri i tyre të dëgjohet, kanalizohet dhe të shihet një format i progresit. Ne nuk e kemi problem të kemi ide të reja, ne kemi problem ti kthejmë idetë në realitet. Prandaj unë shpresoj shumë që këtë samit do ta shfrytëzojmë për të kanalizuar dy-tri projekte të vogla ti çojmë në një tjetër nivel në mënyrë që formate të tilla të shfrytëzohen për të lëvizur agjendën tonë të përbashkët për të fuqizuar zërin e gruas. Por edhe për të gjetur forma se si ta bëjmë gruan sa më të pavarur financiarisht. Sepse mendoj që barra kryesore është financa. Ne nuk duhet në këto formate po ashtu ti harrojmë sfidat që i kemi përpara, por të harrojmë realitetin që në këtë rajon ka shumë gra që vdesin nga burrat.
