“Wizz Air” kompania ajrore me bazë në Budapest në Hungari, nisi ditën e djeshme linjën e re të fluturimit mes Tiranës dhe Lionit. Linja e re do t’u ofrojë pasagjerëve fluturime direkte për në Aeroportin e Lyon Saint-Exupery, dy herë në javë të hënën dhe të premten.

“Aeroporti Ndërkombëtar i Tiranës po krijon vazhdimisht fluturime të drejtpërdrejta me aeroporte të rëndesishme evropiane, duke u ofruar pasagjerëve më shumë shërbime, destinacione dhe zgjedhje fluturimesh jo direkte. Jemi shumë të kënaqur që kemi një destinacion si Lion nga TIA dhe jemi duke rritur portofolin tonë me më shumë destinacione”, tha Shefi i Operimeve të Aeroportit, Z. Jose Carlos Rosa Angeja.

Lioni është një zonë e njohur për udhëtarët, me universitetin e tij dinamik, dyqane të klasit të parë, tregjet antike, festivalet e gjalla të teatrit dhe muzikës dhe gjithashtu një sërë muzeumesh interesante.