Kryetari i bashkisë së Gjirokastrës Falmur Golemi priti në një takim ambasadoren e Polonisë në vendin tonë, Monika Zuchniak-Pazdan, me të cilën bisedoi për projekte në interes të përbashkët.

Gjatë takimit Golemi dhe Pazdan folën për bashkëpunimin në fushën e turizmit.

“Me ambasadoren e Polonisë në vendin tonë, Monika Zuchniak-Pazdan, në të parën vizitë të saj në Gjirokastër, por sigurisht jo të fundit sepse do të rikthehet sërish për të konkretizuar projekte me interes të përbashkët. Folëm për bashkëpunimin në fushën e turizmit duke qenë se Gjirokastra është një destinacion i frekuentuar shumë nga turistët polakë që vijnë në vendin tonë”, theksoi Golemi në një postim në rrjetet sociale.

Kryebashkiaku Golemi u shpreh se “potencialet janë për një fluks shumë më të madh sesa kaq sidomos tani që distanca me Sarandën është shkurtuar në rreth 30 minuta”.

“Lajm shumë i mirë të dëgjoja prej ambasadores ndërtimin në Gjirokastër të një “Traffic Town”, një hapësire moderne të dedikuar për fëmijët, ku argëtimi dhe edukimi për sigurinë rrugore ndërthuren më së miri. Mezi pres që ky projekt të marrë udhë dhe ta finalizojmë sa më parë”, tha Golemi./ATA/

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.