“Skaj lumit Milacka. Ura Latine..këtu nisi Lufta e Parë Botërore.”

Kështu nis dialogu midis Mustafa, një shoqërues Boshnjak disi i rezervuar fillimisht, me akademikun Aidan Hehir. Për t’u bërë personazh të një libri sa interesant aq edhe i sinqertë.

Të dielën, 26 qershor 2022, prej orës 18.00 deri në orën 20.00 në ambjentin e ngrohtë KOHA Restorant & Bar, 10-11 St Martin’s Ct, London WC2N 4AJ  Lidhja  Shqiptaro – Britanik e Artistëve në Londër ( B.A.A.A) organizoi promovimin e librit “ The flowers of Srebrenica” ( Lulet e Srebrenicës) me autor akademikun britanik nga Irlanda z.Aidan Hehir në bashkëpunim me dizenjatorin z. David Frankum.

Nuk është trillim apo fantazi por një libër me një histori të vërtetë e cila nis nga një lidhje humane, shoqërues Mustafa dhe autori, për të na hapur një botë me fakte të rëndësishme.

Dhimbje! Forcë! Vërtetësi!

Tri përbërësit e fuqisë treguese historike-politike-shoqërore të këtij libri.

E vëçanta qëndron edhe në faktin që ky libër i krijuar në atë formë ku të dyja gjuhët, anglisht dhe shqip, janë shoqëruese të lexuesit në çdo faqe të tij i jep më vertetësi mesazhit midis një Irlandesi dhe një Boshnjaku. Publikimi dy gjuhësor është një vlerë e shtuar, në strukturë, përgjatë shfletimit.

Duke qënë në dy variante gjuhësore brënda të njëjtit format të ofron mundësinë që ta lexosh në mënyrën më të mirë për ta kuptuar dhe nuk kushtëzon nivelin gjuhësor.

Libri nënvizon fakte të vërteta të luftës barbare, gjenocidit, pasojave psikologjike, në Bosnjë-Hercegovinë, pikërisht në Srebrenicë.

Ky libër është një protestë e shoqëruar nga pyetje që vet autori i bën vazhdimisht mbi fakte të dhimbshme, shkëputja morale e vëzhguesve të jashtëm një tjetër nënvizim që bëhet në libër, të treguara dhe të para nga vet ai në këtë rrugëtim me Mustafën dhe popullsinë vendase.

Një memorial për të mos humbur asnjëherë kujtesën ndaj tragjedive dhe padrejtësisë që iu bëhet popujve në konflikte ushtarake. Një dritë mbi të vërteta të hidhura që shpesh nuk duam t’i shikojmë apo ti kujtojmë.

Por, nëse nuk do ta bëjmë, brezat nuk do ta mësojnë, historia do të jetë e mangët me një profil të copëzuar realist të gjërave të cilat mbartin debulesën e kësaj shoqërije.

Libër me një shtrirje sa sentimentale po aq edhe motivuese për njohje. Kap disa nyje themelore në marrëdhëniet midis njerëzve edhe të shtresave të ndryshme kulturore.

“ Nuk kishte rëndësi nëse unë isha një akademik dhe ai ishte një shoqërues. Unë shpesh tregoja që edhe im atë kish qënë një shoqërues turistësh. Ne Irlandezët kemi shumë të përbashkëta si mentalitet familjar me ju shqiptarët. Kjo është bërrthama e raporteve shoqërore, baza morale e strukturës familjare, diplomat. Shpesh e mendova  përgjatë udhëtimit tim në Srebrenica që këta njerëz janë tejet me vlerë pasi ky popull është me karakter dhe i fortë në potencialin shpirtëror që ka. “ – shton autori në bashkëbisedimin tonë.

Titulli i librit rrjedh nga simboli i bukur paqedashës, një lule e punuar me grep, ngjyrë jeshile, suvenir që e gjen në ato anë.

Libri është i mundshëm të blihet në Amazon.

Vlerë për brezat dhe njohje me finesë të shkruari dhe strategji letrare me nivel.

Pa të vërtetën nuk mundemi të pretendojmë paqen shpirtërore asnjëherë!

Nga Anila Kadija