Në vijim të vizitave dhe takimeve të realizuara nga delegacioni shqiptar në ngulimet arbëreshe, një rëndësi të veçantë pati takimi i datës 18 qershor 2022 në selinë e Bashkisë së San Demetrio Corone-s, me dymbëdhjetë kryetarët e bashkive arbëreshe. Ngjarja u transmetua në live streaming.

Përpos fjalës së Kryetarit të Bashkisë së San Demetrios, foli znj. Mimi Kodheli, në cilësinë e kreut të Komisionit të Punëve të Jashtme të Parlamentit shqiptar. Në fjalën e saj, Drejtoresha ekzekutive e QSPA-së, prof. Diana Kastrati pasi njohu të pranishmit me aktivitetin e deritanishëm të Qendrës me anë të broshurës së përgatitur, ajo e vuri theksin tek disa nga projektet më të rëndësishme, të cilat kërkojnë bashkëpunimin reciprok për realizim.

Pas prezantimit të detajuar të këtyre projekteve u nënshkrua një protokoll mirëkuptimi, duke hartuar një Deklaratë Synimesh të përbashkëta mes Qendrës së Studimeve dhe Publikimeve për Arbëreshët (QSPA), bashkisë së San Demetrio Corone-s, përfaqësuar nga Kryetari, Z. Ernesto Madeo dhe bashkisë së San Cosmo Albanese-s, përfaqësuar nga Kryetari, Z. Damiano Baffa. Kjo deklaratë ka në fokus realizimin e Arkivit dokumentar materialesh në letër, fotografish, regjistrime këngësh arbëreshë, si dhe në trajtë të digjitalizuar mbi botën arbëreshe.

Bashkitë arbëreshe do të ngrenë arkivin e tyre në mjedise të përshtatura enkas në ngulime të ndryshme arbëreshe. I gjithë materiali që do të jetë në këtë Arkiv në komunat arbëreshe, kopja e plotë e këtij arkivi do të depozitohet edhe në “Shtëpinë e Arbëreshëve” në Tiranë, projekti tjetër i ardhshëm i QSPA-së.

Deklarata e Synimeve, e nënshkruar prej tre institucionesh, do të marrë formë të plotë ligjore në mbledhjet e këshillit bashkiak të institucioneve firmëtare dhe do të nënshkruhet si akt normativ gjatë veprimtarisë “Ditët e librit arbëresh”, që pritet të organizohet së shpejti nga QPSA.