Komuniteti shqiptar në SHBA, i vendosur atje që nga vitet 1880 e në vazhdim, ka qenë një ndër nxitësit dhe mbështetësit kryesorë të vendosjes së marrëdhënieve diplomatike midis Shqipërisë dhe SHBA. Ata ishin dhe janë një urë e fuqishme për konsolidimin e këtyre marrëdhënieve.

Me rastin e 100 vjetorit të vendosjes së marrëdhënieve midis SHBA-ve dhe Shqipërisë ambasada amerikane në Shqipëri ka publikuar një foto të komunitetit shqiptar në Amerikë në fillimet e viteve 1900.

Në foto, anëtarë të komunitetit shqiptar në Worcester, në Piknikun Vjetor të Kishës shqiptare “Fjetja e Shën Mërisë” e themeluar në v.1915.

Fotoja daton në gushtin e v. 1926 dhe ky ishte Pikniu i gjashtë që organizohej në Zarfield Farm, Worcester. Komuniteti në Worcester vijon të organizojë piknikun vjetor të Gushtit, që përkon me festimet e Kishës në 15 gusht me rastin e të Ngjiturit të Zonjës në Qiell. Pikniku vjetor i Kishës, ka qënë një nga aktivitetet më të rregullta të organizuara nga komuniteti shqiptar në Worcester. Në këto grumbullime mblidheshin familjet dhe shoqëria, krijoheshin mundësitë e lidhjeve të reja, flitej shqip, këndoheshin këngë patriotike shqiptare, dhe konsumoheshin ushqime tradicionale shqiptare. Në aktivitete shpalosen tradicionalisht të dy flamujt, flamuri shqiptar dhe ai amerikan.

Ky aktivitet vjetor është pararendës i Festivalit më të madh Shqiptar, dhe prej më shumë se një shekull vijon të organizohet edhe sot nga komuniteti shqiptaro-amerikan në Worcester. Duke jetuar e punuar në një shtet e shoqëri model të demokracisë si SHBA, ata ditën të ruajnë lidhjet e ngushta mes tyre, gjuhën dhe traditat shqiptare, dhe kontribuan shumë në fuqizimin e marrëdhënieve ndërmjet Shqipërisë dhe Shteteve të Bashkuara të Amerikës

Fotoja e kësaj jave është kortezi e familjes Greggon, e cila e ka ruajtur këtë foto, origjinale, prej 96 vitesh.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.