Të dashura motrat “Qiriazi”,
E nderuar presidente e organizatës së mirënjohur “Motrat Qiriazi” znj. Isidoros Tsamblakos dhe gjithë Bordi që ju punoni si motra,
Jam fort e nderuar dhe e pranoj me përulje çmimin e lartë: Gruaja e Vitit 2022 që më keni afruar si Organizatë e mirënjohur “Motrat Qiriazi”. Sa herë lexoj apo dëgjoj për organizatën, në ninëzën e syve të mi vjen një dritëz e përtejme që shndrit midis Motrave Qiriazi dhe Shkollës Shqipe “Alba Life” Ambasador i Kombit, apo kudo ku mësohet SHQIP. E kush më shumë se Motrat Qiriazi mund të përmendet pranë mësimit të Gjuhës Shqipe tek ne në NY, për aktin e tyre si zonjat rilindase në Korçë ku filloi historia më e ndritur e mësimit shqip!
Sa fatlume jeni motra te dashura të Bordit dhe të gjitha ju anëtaret e kësaj organizate që festoni dhe nderoni nënat, motrat shqiptare kudo ku janë! Me të drejtë Parashqevi Qiriazi duke folur, më 8 mars 1950, me rastin e Ditës Ndërkombëtare të gruas ne kujtimet e Skender Luarasit shkruhet se: ‘’Sa e gëzuar jam të qëndroj midis jush në këtë sallë…Sot gruaja shkundi zinxhirët e skllavërisë dhe cila zemër shqiptare nuk gëzohet për këtë ditë të shenjtë që nuk e kishim shijuar për shumë shekuj”!
Në shkollat tona shqipe në të gjithë Nju Jorkun ato janë histori frymëzuese ndaj dhe ata e këndojnë me krenari Këngen e Alfabetit Shqip, të shkruar prej Sevasti Qiriazit:
Armiqëtë o shqipëtarë/ Po përpiqenë/ Shkronjat turçe dhe greqishte/ Të na apënë/ Le t’i mbajnë ata per vetëhe/ Kemi tonatë.
Parashqevi Qiriazi, u bë “ylli i mëngjesit” i emancipimit të gruas ne Unesco. Parashqevi Qiriazi ishte gruaja e parë që shkroi një libër shkollor në gjuhën shqipe dhe e vetmja grua që mori pjesë në Kongresin e Manastirit që kodifikoi Alfabetin e shqipes në nëntor 1908.
S’ka emër më të bukur se të quheni të gjitha motra, ndoshta ju mund të jeni në pikëpamje apo lëvizje të ndryshme si yjet në qiell, por së bashku ndriçoni hapësirën shqiptare kudo ku jeni.
Dhe ju këtë emër të madh me pagëzimin e organizatës suaj “Motrat Qiriazi” e keni mbajtur me nder dhe ballin lart!
Unë dua të falënderoj gjithë koleget e mia duke filluar me gruan e vitit artisten e shkollës shqipe Lindia Mezin Lole që kanë ecur bashkë me ne këto 15 vjet në udhën e ndritur të mësimit të gjuhës shqipe dhe që sot një pjesë të tyre i kemi midis nesh si Arta Xhaferri, Blerim Gjocaj, Majlinda Tafaj, Dr.Manjola Duli, Davida Hasanaj, Anxhela Alushaj, Aferdita Delaj, suportues dhe dashamires si Agim Hasanaj, Perparim dhe Violeta Likollari etj. Ju lutem një duatrokitje për dy tavolinat atje si dhe dy koleget e mia amerikane në Susan Wagner, edukatoret Arlene Amodio dhe Anastasia DiBerardino-Turnbull.
Unë dua të falënderoj familjen time të shtrenjtë, bashkëshortin dhe kolegun tim Qemal Zylo, vajzat Valbonen dhe Klodianen që më kanë mbështetur me fuqinë e zemrës dhe durimin në penën time, 8 librat e botuar dhe në aktivitetet në Diasporë. Dua të falënderoj mbesat e mia Sarandën dhe Emmën, si dhe Dean dhe Richard Jon të cilet nuk munden dot, sepse dhe kohë pandemie është…, por me krenari do t’ju them se kurrë të rriten duhet të jenë suporter të Motrave Qiriazi.
Une jam e lumtur sot që në krah kam nenen e vitit, miken e penës si Pertefe Leka dhe kolegen edukatoren e vitit zonjushen Jonela Hasani qënderohen dhe cmohen nga organizata juaj me shumë vlera. Une shpreh mirënjohje të pakufishme për ju duke u frymëzuar nga thënia e John Kenedit presidentit amerikan se: “Ndërsa shprehim mirënjohjen tonë, nuk duhet të harrojmë kurrë se vlerësimi më i lartë nuk është të thuash fjalë, por të jetosh sipas tyre”.
Fjala e mbajtur në ceremoninë e dhënies së çmimeve
1 Maj, 2022
Queens, New York
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
