Emërtimi i rrugës “Fan Noli” në New Yok është një ngjarje e jashtëzakonshme jo vetëm për komunitetin shqiptar në New York, por për mbarë shqiptaret kudo që janë. Është një nderim që i bëhet një prej figurave më madhështore të kombit shqiptar, që lindi (6 janar 1882, Ibriktepe, Turkqi) e vdiq (13 mars 1965, Fort Lauderdale, Florida, SHBA) në Diasporë por që zemra i rrahu gjithmonë për Shqipërinë.
Në ceremoninë e djeshme të emërtimit të rrugës “Fan Noli” në parkun Morris në Bronx, ishin të pranishëm anëtarë të komunitetit, përfaqësues nga Diaspora, përfaqësues të shteteve të Shqipërisë e Kosovës, si dhe drejtues politikë të qytetit midis të cilëve edhe Senatori Chuck Schumer.
Kryetari i “Vatrës” Elmi Berisha tha se: “Sot është një ditë e shënuar për kombin shqiptar. At Fan Noli, një prej Shqiptarëve më të mëdhenj të shekullit të kaluar përjetësohet me emrin e një rruge në New York. Sot për çdo shqiptar është një ditë e pa harruar, një ditë lavdie e krenarie kombëtare e shtetërore. Një ditë e madhe që do mbesë historike në memorien tonë si komb e si mërgatë në Shtetet e Bashkuara të Amerikës. Shërbimi i At Fan Nolit ndaj popullit, e shtetit e kombit të tij është gjeniale”.
Lexo edhe: Këshilltarja anuloi emërtimin e rrugës “Fan Noli”, shqiptarët protesta në Bronx
Ndërsa e ka përshëndetur këtë ngjarje Kryeministri i Kosovës Albin Kurti u shpreh se :
Përkujtimi i këtij rilindësi, njeriut të letrave dhe figure historike shumëplanëshe, me anë të emërtimit sot të një rruge në nju jork, është një ngjarje simbolike e përbashkuese e komunitetit shqiptaro-amerikan, i cili vijon veprimtarinë e tij patriotike me të njëjtin gjallëri e përkushtim si edhe brezat e mëparshëm. në sajë të kësaj veprimtarie mbahet gjallë e pasurohet identiteti shqiptar në shba, si edhe forcohet aleanca e shkëlqyeshme e kombit shqiptar me kombin amerikan. urime shqiptaro-amerikanëve për kurorëzimin e punës së tyre për vendosjen në nju jork të kësaj shenje simbolike me domethënie të madhe!
Lexo edhe: SHBA/ Protesta në Bronx: Askush nuk e mohon dot kontributin e shqiptarëve
Ambasadorja e Shqipërisë në SHBA Floreta Luli-Faber e pranishme në këtë ceremoni gjatë fjalës së saj theksoi se “Fan Noli njihet si kontribues i themelimit të disa institucioneve të diasporës shqiptare në SHBA, themelues i Kishës Autoqefale Ortodokse Shqiptare, bashkëthemelues i Federatës Pan-Shqiptare Vatra dhe drejtues i gazetës Dielli. Ai ishte një nga zërat e fuqishëm për pranimin e Shqipërise në Lidhjen e Kombeve. Ai ishte Kryeminister i vendit, një qytetar me shpirt të lire, demokrat dhe patritot.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
