Qeveria austriake ka hequr detyrimin për tu vaksinuar kundër Covid-19. “Kemi vendosur të ndjekim këshillat e komisionit të ekspertëve” dhe të “pezullojmë” vaksinimin e detyrueshëm, deklaroi Ministrja për Çështjet Kushtetuese Karoline Edtstadler gjatë një konference për shtyp në Vjenë.

Sipas saj imponimi, për shkak të pranisë së variantit Omicron, nuk është më proporcional. Megjithatë, situata do të rivlerësohet brenda tre muajsh, sipas ministrit të shëndetësisë Johannes Rauch.

Detyrimi hyri në fuqi në fillim të shkurtit dhe kontrollet duhej të niseshin nga mesi i marsit, me pasojë dënime të rënda. Kohët e fundit, megjithatë, ishin ngritur dyshime të shumta në lidhje me zbatueshmërinë reale të dispozitës.

Vendimi bazohet në një opinion nga task forca e ekspertëve, i cili konfirmon dobinë e vaksinës, por sugjeron fleksibilitet sipas situatës aktuale, veçanërisht duke qenë se varianti dominues nuk mbulohet plotësisht nga vaksina.

“Ashtu si virusi, edhe ne duhet të përshtatemi vazhdimisht,” vazhdoi Edtstadler. Për këtë arsye ligji nuk revokohet por mbetet në gatishmëri. “Si ish-gjyqtar jam i bindur se një ligj pa sanksione është i kotë”, vijoi ministrja. Nëse situata e kërkon këtë në vjeshtë, qeveria do të jetë në gjendje të “reagojë në kohën e duhur”, shpjegoi Edtstadler.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.