Bujar Salihu nga Gjilani, më 1990 regjistrohet në Fakultetin e Elektroteknikës në Prishtinë. Por vetëm një vit më vonë për shkak të rrethanave politike u detyrua t’i ndërpresë studimet, për të mërguar në Zvicër. Është aktiv në organizimet letrare të Krijuesve Shqiptarë në Zvicër, aktualisht Kryetar i saj. Autor i disa librave të cilët janë përkthyer dhe botuar në anglisht, gjermanishte, frëngjishte, rumanishte etj. Në një intervistë për “Diaspora Shqiptare” kryetari i Shoqatës së krijuesve shqiptarë në Zvicër tregon më shumë detaje lidhur me shoqatën.
Jeni larguar nga vendlindje në 1992, por nuk keni hequr dorë nga lidhja me shqiptarët apo jo?
E vërtet. Aq më tepër që në Zvicër gjeta një komunitet shumë të organizuar, të lidhur e të përkushtuar për kombin dhe atdheun.
Ka kaluar një vit nga botimi i librit tuaj “Linga e heshtjes”, keni në plan të botoni një tjetër libër?
Po, planifikoj dhe po punoj që në shkurt të vitit të ardhshëm të botoj librin tim të radhës, të pestin e që kështu edhe simbolikisht të shënoj 50 vjetorin e ardhjes sime në jetë.
Pas një viti si e vlerësoni suksesin e librit “Linga e Heshtjes”?
Edhe përkundër kufizimeve të shumta që patëm gjatë kësaj periudhe pandemike, mendoj se “Linga” arriti që të “shpërthej rrethimin”, të gjejë lexuesin dhe të etablohet si një përmbledhje poetike serioze. Patëm një përurim në Prishtinë dhe presim që deri në fund të vjeshtës të kemi edhe një tjetër në Zvicër. U shkrua për te nga kritik të njohur, u vlerësua edhe nga shumë miqë e lexues gjithandaj, duke më krijuar kështu një ndnjenjë shumë të veçantë emocionale parasëgjithash, por edhe një satisfaksion gjithësesi…
Ju jeni drejtues i Shoqatës së krijuesve shqiptarë në Zvicër dhe muajin që lam pas zhvilluar një takim mes krijuesve. Cili është objektivi i kësaj shoqate?
Po në fakt ne hapëm sesionin e aktiviteteve tona vjeshtore, pikërisht me moton “Eja me vjeshtën”, duke u bërë thirrje të gjithë krijuesve të të gjitha profileve që të bashkohemi për të krijuar bashkë agjendën e aktiviteteve tona, që do pasohen gjithësesi me përurime librash, ekspozita, lexime, biseda me krijues, tryeza tematike etj. Objektivi ynë është i qartë; mbështetje për krijuesit, gjithnjë duke u vënë në shërbim të tyre, për të prezentuar, kultivuar, e përuruar vlerat kulturore, e në anën tjetër mundësi e mire kjo komunikimi e njohje me artdashësit tanë në Zvicër e më gjërë.
Cfarë u diskutua në takimin e shtatorit?
Në takimet e shtatorit kryesisht u përqëndruam në prurjet tona të fundit, prezentimin e tyre, shkëmbimin e librave si mundësi e mirë për të rrumbullaksuar ate që thashë më lartë, një agjendë të ngjeshur aktivitetesh kulturore këtë vjeshtë. Lexuam por edhe kujtuam dy poetë tanë shumë të veçantë që kohë më parë ndërruan jetë: Agim Shehun (1934) dhe Ndue Sinishten(1944).
A janë të shumtë krijuesit shqiptarë në Zvicër?
Kam bindjen se në Zvicër, si askund tjetër ka një përqëndrim shumë të madh të krijuesve tanë, përfshirë këtu edhe emra eminent nga letërsia jonë, por edhe krijues të profileve të tjera. Pikërisht për këtë ShKShZ ka një organizim sektorial të tillë që mundohet të bashkoj katër profilet kryesore; Letërsi, arte pamore, teatër dhe muzikë. Flasim për rreth 300 krijues profilesh të ndryshme, e që për organizimin e mire të tyre ShKShZ ka ende shumë punë.
E pengoi apo e ndihmoi pandemia krijimtarinë?
Ajo që mund të thuhet me sigurinë e plotë është se, pandemia e pengoi organizimin e jetës kulturore gjithandej, e pengoi edhe shoqatën tonë, sa që ne nuk arritëm që të realizojmë pjesën më të madhe të projekteve tona kulturore në njëzet muajtë e kaluar.
Izolimi, mbyllja sikur e stimuluan krijimtarinë dhe ndoshta pati rekord botime të reja por edhe krijimtari të frytshme e të suksesshme përgjithësisht.
Si shoqatë jeni të angazhuar në ditët e Kulturës në Zvicër?
Po, disa anëtar tanë prezentojnë artin e tyre. Gjejë rastin që të përgëzoj organizatorët dhe të ftoj artdashësit që me pjesëmarrjen e tyre të kontribojnë sa më shumë, që ditët e kulturës në Zvicër të vajnë mbarë.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
