Sot për herë të parë para Bashkisë së qytetit të Halifaksit, Nova Scotia në Kanada u ngrit flamuri i Kosovës. Por për shkak të gjendjes së rënduar të pandemisë COVID-19 nuk janë lejuar pjesëmarrës.

Kryetari i Shoqatës Shqiptaro- Kanadeze në Halifax Esat Rexhepi në një status në profilin e tij në Facebook shkruan:

“17 Shkurti është shënuar dhe do përkujtohet si data e lirisë dhe sovranitetit. Është dita ku u përmbush dëshira e zjarrtë për çlirimin nga kthetrat e okupuesve që Kosovën e shihnin si zemrën e tyre. Kjo datë është ajo për të cilën dhanë jetën e tyre dhe sakrifikuan familjet shumë njerëz te cilëve burgosjet, dhunimet, torturat, djegiet, internimet, vrasjet dhe masakrat që ishin më të mëdhatë pas Luftës së Dytë Botërore në Evropë, u ishin bërë të padurueshme dhe mbrojtën atdheun e tyre nga Kasapi i Ballkanit, i cili mbart përgjegjësi personale për krime kundër njerëzimit të kryera në Kosovë dhe vendet fqinje.

Edhe pse shumë prej këtyre njerëzve të lapsit e të pushkës, akademikë, luftëtarë, sypatrembur, nuk arritën t’i shijonin frytet e sakrificës të misionit të tyre, ata arritën të na çlirojnë  nga duart grabitqare të Milloshevicit. Këtë e dëshmon më së miri dita kur Kosova shpallet Shtet i pavarur dhe demokratik.

I urojmë popullit kosovar, pasardhësve trungut dardan, ditën e shenjtë të Pavarësisë dhe urojmë që secila sfidë gjatë rrugës për shtetndërtim të kapërcehet sa më shpejtë, që të përmbushet plotësisht misioni i atyre qe dhanë jetën për këtë liri.

Urime e Lavdi gjakut të dëshmorëve!”

Ai shprehet i gëzuar që flamuri i Kosovës valon në Halifax, dhe falënderon edhe Ambasadën e Republikës së Kosovës në Ottawa.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.