Ndërkohë që këto ditë Gjermania mori vendim për të njohur patentët e shoferëve nga Kosova, kanë nisur procedurat që një gjë e tillë të bëhet edhe nga shteti i Kanadasë. Këtë javë, gjatë mbledhjes së Qeverisë së Kosovës, ministri i Punëve të Brendshme, Xhelal Sveçla ka prezantuar një projekt-marrëveshje.“Pas një angazhimi të gjatë, për njohjen reciproke të patent- shoferëve nga Gjermania, kam nderin që para jush të prezantojë nismën për lidhjen e marrëveshjes ndërkombëtare mes Qeverisë së Kosovës dhe Qeverisë së Kanadasë,  për njohje reciproke të patent- shoferëve”,  citojnë ministrin mediat në Kosovë.
Me anë të kësaj marrëveshjeje, qytetarët e Kosovës që jetojnë dhe punojnë në Kanada nuk do të kenë nevojë t’i nënshtrohen procedurave të tjera për vozitje. Në konferencën për shtyp pas mbledhjes së qeverisë kryeministri Albin Kurti u shpreh:“Kjo nismë tregon gatishmërinë të dy shteteve për marrëveshje. Aktualisht qytetarët tanë në Kanada iu nënshtrohen provimeve nënshtruese për t’u pajisur me patent-shoferë. Pas nënshkrimit të kësaj marrëveshje, nuk do t’i nënshtrohet këtyre procedurave”.
Nëse poseduesit e patent-shoferëve iu është dhënë leje-qëndrim në shtetin e palës kontraktuese, atëherë të dy palët do t’i njohin patent-shoferët pa pas nevojë t’i nënshtrohen procedurave të tjera”, thuhet ndër të tjera në njoftimin e Qeverisë së Kosovës.
Me këto marrëveshje qytetarët e Kosovës që kanë leje qëndrimi në Kanada nuk kanë nevojë të hynë në provime plotësuese apo teste të ndryshme për vozitje.
Lajmi për nisjen e procedurave të njohjes së patent-shoferëve kosovarë në Kanada është dhënë paralel me realizimin e marrëveshjes në mes Kosovës e Gjermanisë për njohjen reciproke të patentë-shoferëve.
Ende nuk ka njoftim publik nga Ambasada e Kosovës në Ottawa rreth arritjes së kësaj marrëveshjeje apo kohën kur nis implementimi i saj.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.