105 vjet më parë lindi Musine Kokalari, një ndër shkrimtaret e para shqiptare, intelektuale dhe veprimtare politike e njohur. Një nga figurat më të rëndësishme të grave shqiptare të shekullit XX, ndër të tjera ajo kontribuoi në fushën e letrave me veprat: “Siç më thotë nënua plakë”, “Rreth vatrës”, “Sa u tund jeta”.

Lindi në Adana. Më 1920 u kthye së bashku me familjen në Shqipëri, ku nisi shkollën fillore në Gjirokastër dhe pas nëntë vjetësh u zhvendosën në Tiranë. Vëllai i saj, Veisimi, kishte një librari në kryeqytet në mesin e viteve ’30. Më 1937 mbaroi Institutin “Nëna Mbretëreshë” dhe më pas vijoi studimet në Universitetin e Romës, në Itali, të cilin e mbaroi shkëlqyeshëm më 1941 me një temë diplome për Naim Frashërin.

Më 1943, së bashku me Mit’hat Aranitin dhe miq të tjerë, themeloi Partinë Social-Demokrate. Më 1944 vëllezërit e saj Muntaz e Vejsim Kokalari u pushkatuan pa gjyq. Musine Kokalari ishte një nga 30 shkrimtarët e parë të burgosur që u regjistruan në vitin 1960 nga Komiteti i Treshit (pararendës i Klubit PEN).

Më 1993, Kokalari u shpall pas vdekjes “Martir i Demokracisë” dhe një shkollë në Tiranë mban emrin e saj.