Pas testimeve të suksesshme kompania WizzAir uli sot avionët e saj në aeroportin ndërkombëtar të Kukësit “ZAYED – Flatrat e Veriut”, me 4 destinacionet e para drejt Austrisë, Gjermanisë dhe Zvicrës, fillimisht nga dy herë në javë
Qytetarët shqiptarë dhe turistët e huaj do të kenë mundësi të udhëtojnë nga aeroporti ndërkombëtar i Kukësit në drejtim të Zvicrës, Gjermanisë dhe Austrisë, nga muaji maj me 19 euro.
I pranishëm në ceremoninë e mbajtur me këtë rast, Kryeministri Edi Rama, u shpreh se, “më vjen shumë mirë që jemi përsëri këtu në aeroportin ndërkombëtar të Kukësit për të lajmëruar ardhjen e avionëve të kompanisë Wizz Air pas një periudhe të rëndësishme bashkëbisedimesh, diskutimesh, analizash nga ana e kompanisë dhe testimesh”.
Faktikisht, theksoi Rama, “nga sot kompania është e vendosur edhe në Kukës dhe fillon me prenotimet për 4 destinacionet e para, nga 2 herë në javë dhe të cilat nga maji do të jenë destinacione të vijueshme, jo thjesht për sezonin”.
Ndërkohë, shtoi kreu i qeverisë, “me drejtorin e madh të kompanisë kemi diskutuar edhe për destinacionin tjetër të rëndësishëm që është Anglia. Dhe unë nuk do t’i ndahem Kukësit deri kur “The London boys of Kukës” të kenë fluturimet nga Kukësi në Londër dhe nga Londra në Kukës, ose nga destinacione të tjera rreth e rrotull me tarifa krejtësisht simbolike”
“Kjo është dita për t’i thënë të gjithë atyre që nuk kanë asnjë kapacitet durimi se kjo punë dhe të gjitha punët e mira kërkojnë durim. Shumë gjëra kemi dëgjuar pasi anonçuam fillimin e punës për aeroportin ndërkombëtar të Kukësit. Pastaj pasi e hapëm aeroportin e ri ndërkombëtar të Kukësit. Me siguri të tjera do të dëgjojmë edhe sot, por në fund fjalët i merr era dhe punët e mira mbeten. Unë jam shumë besimplotë që ky aeroport ka një të ardhme fantastike dhe e gjithë kjo zonë ka një të ardhme fantastike edhe falë këtij aeroporti”, tha Rama.
Rama falënderoi drejtorin e kompanisë për gatishmërinë për ta parë Kukësin si një mundësi, sepse, u shpreh Rama, “në fillim ai ishte pak skeptik, por pastaj e gjithë analiza e bërë rezultoi në favor të aeroportit”.
“Sot ne jemi këtu për t’i dhënë një mundësi të re të gjithë banorëve, jo vetëm të Kukësit, por të një treve të tërë që përfshin dhe pjesën matanë bjeshkëve në Kosovë dhe pjesën e Maqedonisë së Veriut, duke iu hapur 4 destinacione, në Austri, në Gjermani dhe në Zvicër. Janë tre vende me 4 destinacione 2 herë në javë, ndërkohë që çmimet e udhëtimit siç e patë janë 19 euro, për secilin destinacion”. /ATA/
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
