Shkrimtarja shqiptare Irma Kurti shpallet një nga finalistët në konkursin e Casa Sanremo Writers, me librin “Le onde chiamano il tuo nome” (Dallgët thërresin emrin tënd) botuar nga Besa Editrice. Konkursi letrar konceptohet dhe organizohet nga i njëjti staf drejtues i Festivalit Italian të Këngës në Sanremo.

Ceremonia finale do të zhvillohet gjatë ditëve të Festivalit të 72-të të Këngës Italiane, pra në shkurt 2022 dhe së bashku me eventet e zhvilluara në “Casa Sanremo”, të përzgjedhurit do të kenë mundësinë të prezantojnë veprat e tyre.

Prej vitesh, Casa Sanremo është kthyer në një potencial me vlerë për prezantimin e librave të shumë autorëve dhe shtëpive botuese.

“E konsideroj një sukses në karrierën time këtë vlerësim, jo vetëm pasi vepra është përzgjedhur nga një juri profesionale, por edhe pse do të jetë një mundësi e bukur ta prezantoj këtë libër në kontekstin e Festivalit Italian të këngës” thotë Kurti për “Diaspora Shqiptare”.

Romani “Dallgët thërresin emrin tënd” trajton një temë të nxehtë të shoqërisë së sotme, atë të dhunës fizike e verbale në familje, një fenomen shqetësues, gjithnjë e në rritje për realitetin shqiptar, po edhe më gjerë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.