Espanjol u kualifikua me vështirësi në Kupën e Mbretit ndaj Ponferradinas duke kaluar vetëm me penallti, por duket se qëllimet e skuadrës katalanase në këtë sezon janë që të tentohet trofeu. Këtë e ka zbuluar Keidi Bare në një prononcim për mediat, teksa ka theksuar se një turne i tillë është i mundshëm për skuadrën e tij.

Bare ishte protagonist në Kupë, duke shënuar një nga penalltitë që i dhanë kualifikimin ekipit, ndërsa në turin tjetër, do të jetë përballë një kundërshtari jo të pakalueshëm si Majorka. “Kanë lojtarë të mirë, por ne shkojmë atje me qëllimin për të fituar dhe kaluar turin. Do ia dalim. Në dhomat e zhveshjeve kemi folur shpesh që na pëlqen shumë Kupa e Mbretit ndaj do të synojmë fitoren e këtij kompeticioni. Ky është një turne i cili historikisht i ka ecur mirë klubit”, shpjegoi Bare.

I pyetur më pas për momentin që po kalon, duke u kthyer në një element shumë të rëndësishëm për Espanjol, Bare i ka dhënë merita shokëve të skuadrës. “Ndjehem mjaft mirë dhe jam në një formë shumë të mirë falë të gjithë gjërave më të cilat më ndihmon ekipi”, ishin fjalët e mesfushorit shqiptar.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.