Krahina më e madhe kanadeze, Ontario po mbyll një sërë industrish, perfshirë këtu shkollat, palestrat dhe restaurantet. Këto kufizime të reja gjithëpërfshirëse nënkuptojnë mbylljen e shkollave, e të cilat do të vijojnë me mësimin online deri të paktën më 17 janar, thuhet në njoftimin qeveritar të publikuar në mediat lokale kanadeze. Kufizimet e reja, përfshijnë gjithashtu uljene njerëzve që mund të grumbullohen nga 10 për 5 persona brenda dhe për 10 persona jashtë. Këto rregulla hyjnë në fuqi më 5 janar dhe do të jenë në fuqi për 21 ditë, njoftoi qeveria të hënën.
“Qëllimi i menjëhershëm i këtyre masave do të jetë zbutja e valës së fundit në mënyrë që të mund të lehtësojmë presionin mbi spitalet tona,” tha para gazetarëve kryeministri i Ontarios Doug Ford.
Muzetë, galeritë, kopshtet zoologjike dhe qendrat shkencore do të mbyllen gjithashtu. Për të ndihmuar bizneset e vogla gjatë raundit të fundit të mbylljeve, qeveria thotë se po zgjeron programin e saj të zbritjes së kostove të biznesit. Bizneset e pranueshme do të marrin pagesa zbritje ekuivalente me 50 për qind të taksës së pronës dhe kostove të energjisë që ata bëjnë, ndërkohë që i nënshtrohen kufijve aktualë të kapacitetit.
Kryeministri Doug Ford njoftoi ndryshimet në një konferencë shtypi në mëngjes të hënën. Atij iu bashkuan ministrat e tij të shëndetësisë dhe financave, si dhe shefi mjekësor i shëndetësisë në Ontario.
“Ekspertët tanë të shëndetit publik na thonë se mund të shohim qindra mijëra raste çdo ditë”, tha Ford për rritjen e vazhdueshme të rasteve të reja COVID-19 të shkaktuara nga varianti Omicron që është përapur me të madhe muajin e fundit në Kanada. “Nëse nuk bëjmë gjithçka që është e mundur për ta vënë nën kontroll këtë variant, rezultatet mund të jenë katastrofike”- shtoi ai.
Ontario raportoi një rekord gati 20,000 raste të reja të COVID-19 në ditë pas Krishtëlindjeve, numër që ngrihet apo bie ngadalë dhe nuk dallon shumë nga dita në ditë. Kufizimet erdhën pikërisht në ditët kur Ontario raportoi gati 20,000 raste të reja të të infektuarve në ditë.  Edhe krahina tjetër në Kanada, Kebeku ka në fuqi rregulla të rrepta të luftimit të pandemisë, të parashikuara të zgjasin  për disa javë. Në nivelin federal, në Kanada deri më tani janë konfirmuar mbi 2 milion raste, kanë vdekur mbi 30,000 persona.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.