Ka qenë një sipërmarrje personale e sopranos shqiptare në Danimarkë Feride Istogu Gillesberg dhe bashkëshortit të saj danez Tom Gillesberg realizimi i një albumi me krijimtarinë e pianistes së njohur shqiptare Lola Gjoka. Janë këngë të kompozuara 100 vite më parë dhe dëshira e Lola Gjokës që këto këngë të regjistrohen, më në fund u plotësua!

“Lola Gjoka Aleksi ka qene pianistja e parë shqiptare e cila i ka dëgjuar këngët shqiptare. Lola Gjoka e cila ka lindur më 1910 dhe u nda nga jeta më 1085 së bashku me Tefta Tashko Kocon i kanë mbledhur këngët shqiptare, me qëllimin për të kuptuar se cila është muzika autentike shqiptare. Ajo i ka kompozuar për piano, i ka aranxhuar për tu luajtur në piano. Këto këngë nuk janë regjistruar kurrë. Ky është një thesar për gjithë shqiptarët, por edhe për botën sepse të gjitha këngët, secila këngë është si një rruazë e vecantë në një gjerdan të plotë të mrekullueshëm. Kjo është një dhuratë të cilën e kemi nxjerrë nga toka dhe po ja japim popullit shqiptar” u shpreh Feride Istogu Gillesberg.

Albumi është regjistruar në kishën e Virumit në Danimarkë dhe përmban mbi 50 këngë të kompozuara gjatë viteve tridhjetë të shekullit të kaluar, shkruan “Diaspora Shqiptare”.

Këngët janë një kombinim i shkëlqyeshëm i muzikës klasike dhe këngës popullore shqiptare.

Për tu realizuar ky projekt i cili do të finalizohet me një album që do të përbëhet nga dy cd, janë angazhuar edhe Maestro Zhani Ciko, soprano Mariana Leka, pianiste me vendbanim në Zvicër Ermira Lefort, pianiste Rudina Ciko, soprano Erinda Agolli, tenor Gerald Murrja, tenor Antonio Zefi si dhe soprano Feride Istogu Gillesberg dhe tenori danez Stig Fogh Andersen, i cili edhe ka dhënë një mund të jashtëzakonshëm për realizimin e këtij projekti.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.