Në qarkun e Gjirokastrës dhe në Lunxhëri banorët po përballen me tmerrin e flakëve, ndërsa është është gjetur i djegur një burrë rreth 65 vjeç.

Ai së bashku me bashkëshorten, e cila është dërguar në spital në gjendje të rëndë, po përpiqeshin të shuanin flakët në shtëpi.

Aktualisht janë fshatrat “Asim Zeneli”, “Arshi Lengo” dhe “Krina” në Njësinë Administrative Lunxhëri – Antigone të cilat janë në situatë emergjente për shkak të flakëve.

Forcat e ushtrisë dhe banorët po përdorin çdo mjet të mundshëm për t’i shuar, por flakët vijojnë të përhapen të favorizuar nga era dhe temperaturat e larta.

Tashmë kërkohet ndihmë nga ajri pasi rrezikohen jetë njerëzish në atë zonë.

Në vendngjarje po punojnë strukturat e mbrojtjes civile, gjithashtu në mbështetje kanë shkuar edhe Forcat e Armatosura.

Ministri i Mbrojtjes, Niko Peleshi ka shkuar pasditen e sotme në fshatin “Asim Zeneli” në Gjirokastër, ku situata nga zjarret paraqitet mjaft kritike, ku është regjistruar një viktimë dhe një e plagosur.

Në një prononcim për mediat, Peleshi theksoi se situata është mjaft e vështirë.

“Jemi në Gjirokastër. Është një situatë shumë e vështirë me vatra zjarri të lokalizuara në vende të ndryshme. Nuk është kollaj të vendosen në kontroll. Kemi humbje jete. Me pak fjalë duhet evakuim në këto tre fshatra. Ju bëj thirrje banorëve të mos rezistojnë dhe të largohen nga fshati,. Ne do të bëjmë më të mirën. Do t’i përqendrojmë të gjitha forcat për të bërë më të mirën. Ju lutem bashkëpunoni për të dalë nga banesat,” tha Peleshi.