122 vjet më parë u botua revista “La nuova Albania” (“Shqipenia e re”, 1898–1899, 1904).
E drejtuar nga avokati arbëresh Genario Lusi, revista u botua në Napoli, në italisht e pjesërisht edhe në arbërisht, si organ i “Komitetit Politik Shqiptar të Napolit”.
Numri i parë doli më 8 maj 1898, vijoi 20 numra deri më 1899. Në vitin 1904 u rihap, duke u botuan edhe 7 numra të tjerë.
“La nuova Albania” botoi të dhëna historike, kulturore e folklorike nga Shqipëria; përkrahu lëvizjet kulturore e arsimore të rilindësve shqiptarë në Itali, Greqi, Stamboll, Bukuresht, Egjipt etj.; ngriti nevojën e krijimit të një shteti shqiptar të lirë e të pavarur, ku të përmblidheshin të gjitha trojet dhe popullsia shqiptare.
Ajo i bëri jehonë edhe miqësisë ndërmjet popullit italian dhe popullit shqiptar.
