Mjekët e Diasporës shqiptare këto ditë kanë dhënë disa këshilla për bashkëkombasit e tyre, për të marrë masa me qëlllim parandalimin e përhapjes së COVID-19.
Mario Ademaj, mjek shqiptar në Çikago të SHBA-së dhe president i organizatës “Albanian International Medical Team”, përmes një video të publikuar në rrjetet e tij sociale, u jep përgjigje disa prej pyetjeve të ngritura nga qytetarët lidhur me koronavirusin.
Ai sqaron se pavarësisht kushteve klimatike dhe lagështisë virusi arrin të mbijetoje dhe të përhapet në vende të ndryshime, pasi ai jeton në trupin e njeriut ku temperatura është 37 gradë celsius.
KORONAVIRUSJ DHE FAKTET: Pyetje dhe pergjigje nga Dr. Mario Ademaj, vetem me fakte. Shperndajeni qe te mire-informojme publikun dhe ti mbrojme kunder informacionit fallco!
Gepostet von Mario Ademaj am Sonntag, 15. März 2020
“Koronavirusi jeton në trupin e njeriut ku temperatura është midis 36-37 gradë celsius, nuk ka ndryshim sa ftohtë apo si është klima jashtë për koronavirusin” , shprehet ai.
Ndërkohë, Ademaj ka marrë dhe një nismë personale për të ndihmuar vendin e origjinës duke i dërguar një letër OBSH-së që të mbështes vendet si Shqipëria dhe Kosova, në këtë situatë emergjente.
“… mora këtë iniciativë, sepse OBSH-ja ka një komitet dhe një fond emergjence për shtetet si Shqipëria dhe Kosova, që mund të na ndihmojnë jo vetëm me mbështetje nga fondet, por edhe materiale, pajisje, maska, specialistë. Shqipërisë dhe Kosovës këto i duhen për momentin“, tregon ai në një intervistë për mediat shqiptare.
Prej disa vitesh, Ademaj vjen dhe në vendin e origjinës për të dhënë kontributin e tij mjekësor.
