Ministrja e Evropës dhe Punëve të Jashtme të Shqipërisë, Eliza Spiropali, ngriti në Athinë dy çështje të ndjeshme të agjendës shqiptaro-greke: heqjen e të ashtuquajturit “ligj i luftës” mes dy vendeve dhe aspektet historike, ligjore dhe pronësore që lidhen me komunitetin çam, duke shkaktuar reagime në opinionin publik grek.
Gjatë takimit të zhvilluar në Ministrinë e Jashtme greke me homologun e saj, Giorgos Gerapetritis, Spiropali i përmendi këto tema edhe në deklaratat e përbashkëta për shtyp, pa i emërtuar drejtpërdrejt, por duke iu referuar “çështjeve historike, ligjore dhe pronësore që prekin qytetarë dhe komunitete”.
Sipas saj, këto çështje duhet të trajtohen “pa diskriminim etnik”, në kuadër të reformave në kadastrën dhe sistemin e sigurimeve shoqërore, duke propozuar negociata teknike për një marrëveshje dypalëshe. Në këtë kontekst, Spiropali theksoi nevojën për një qasje graduale dhe realiste, në përputhje me kuadrin ligjor dhe frymën evropiane, me synimin forcimin e besimit të ndërsjellë dhe zhvillimin e mëtejshëm të marrëdhënieve miqësore mes dy vendeve.
Një tjetër pikë e theksuar nga ministrja shqiptare ishte heqja e ligjit të luftës, të cilin ajo e cilësoi si një relikt të vjetruar të Luftës së Dytë Botërore, që sipas saj nuk përputhet me marrëdhëniet bashkëkohore të aleancës dhe bashkëpunimit mes Shqipërisë dhe Greqisë.
Nga pala greke, ministri i Jashtëm Gerapetritis nuk iu referua drejtpërdrejt këtyre çështjeve në deklaratat publike, duke u përqendruar në mbështetjen e Greqisë për rrugën evropiane të Shqipërisë dhe rëndësinë e dialogut konstruktiv dypalësh.
Qëndrimi i rezervuar i Athinës, veçanërisht lidhur me çështjen çame, u interpretua nga mediat greke si një heshtje diplomatike, ndërsa debati mbi temat historike dhe pronësore vijon të mbetet një nga pikat më të ndjeshme në marrëdhëniet mes dy vendeve.
Dimokratia.gr



