Gjykata Themelore në Prishtinë ka miratuar kërkesën e Prokurorisë Speciale të Kosovës për lëshimin e një urdhërarresti ndërkombëtar ndaj Milan Radojiçiç dhe dhjetë personave të tjerë, të dyshuar për përfshirje në vendosjen e barrikadave në komunat veriore të Kosovës në vitin 2022.

Në një njoftim për media, gjykata bëri të ditur se urdhërarresti është lëshuar në kuadër të veprimeve hetimore që po zhvillohen ndaj rreth 50 personave. Ata dyshohen për kryerjen e veprave penale si: “pengim i personit zyrtar në kryerjen e detyrave zyrtare”, “thirrje për rezistencë” dhe “bashkim për veprimtari kundër rendit kushtetues”.

Zëdhënësja e Prokurorisë Speciale, Arbnora Luta, konfirmoi për mediat se Radojiçiç është ndër figurat kryesore në këtë rast, dhe se ndaj tij dhe dhjetë të dyshuarve të tjerë është lëshuar urdhërarrest ndërkombëtar.

Ngjarjet lidhen me korrikun e vitit 2022, kur autoritetet në Prishtinë vendosën që qytetarët me targa dhe dokumente serbe duhet të pajisen me dokumente të përkohshme të Kosovës për të hyrë në vend. Si kundërpërgjigje, serbët në komunat veriore ngritën barrikada dhe bllokuan rrugë dhe pika kufitare, duke shkaktuar një krizë të thellë sigurie në atë kohë.

Milan Radojiçiç, i njohur si figurë me ndikim në veriun e Kosovës dhe i lidhur ngushtë me strukturat paralele të mbështetura nga Beogradi, luajti një rol kyç në organizimin e këtyre bllokadave. Ai është gjithashtu i dyshuari kryesor për sulmin e armatosur të ndodhur në shtator të vitit 2023 në fshatin Banjska të Zveçanit, ku mbeti i vrarë një polic i Kosovës.

Autoritetet kosovare janë të vendosura të çojnë përpara hetimet dhe ndjekjet penale ndaj të gjithë personave të përfshirë në këto veprime që cenojnë rendin dhe sigurinë kushtetuese të vendit.