Ministri për Evropën dhe Punët e Jashtme, Igli Hasani, zhvilloi sot një takim me Kryetarin e Këshillit Kombëtar Shqiptar në Serbi, Enkel Rexhepi. Gjatë takimit u vlerësua bashkëpunimi produktiv mes dy institucioneve dhe u theksua nevoja për intensifikim dhe zgjerim të tij në fusha të ndryshme si ekonomia, arsimi dhe kultura.
Ministri Hasani në një postim në rrjetet sociale bëri të ditur se Qeveria shqiptare ka gjithmonë në fokus mbrojtjen e të drejtave dhe lirive themelore të shqiptarëve në Luginën e Preshevës, si dhe kultivimin dhe avancimin e identitetit kombëtar dhe kulturor të tyre.
Ky takim është një tjetër hap përforcues drejt bashkëpunimit ndërkufitar dhe mbështetjes së komunitetit shqiptar në Serbi, duke kontribuar në përmirësimin e kushteve të jetesës dhe ruajtjen e kulturës kombëtare.



