Një episod i pazakontë ndodhi gjatë etapës së tretë të Giro d’Italia në Shqipëri, kur një dhi e zezë u shkëput nga tufa dhe hyri papritur në pistën e garës në Vlorë, duke rrezikuar çiklistët në mes të garës. Për fat të mirë, asnjë aksident nuk u regjistrua.
Ngjarja ndodhi gjatë një segmenti prej 160 kilometrash, që përfshinte edhe ngjitjen e famshme mbi Qafën e Llogarasë. Çiklisti nga Zelanda e Re, Dion Smith, ishte më pranë përplasjes, por reagimi i tij i shpejtë shmangu incidentin: ai doli për pak çaste nga pista për të shmangur kafshën dhe më pas vazhdoi garën.
Videoja e dhisë në pistë është bërë virale në rrjetet sociale, ku shumë e kanë quajtur “personazhin e ditës”. Pamjet kanë ngjallur të qeshura, por edhe shqetësime për sigurinë e garës.
“Momente të tilla tregojnë se në një garë si Giro d’Italia, gjithçka mund të ndodhë,” shkroi një komentator sportiv në rrjetin X (ish-Twitter).
Organizatorët nuk kanë dhënë ende një deklaratë për këtë incident, por besohet se dhia ka ardhur nga një tufë pranë rrugës. Etapa përfundoi pa vonesa të tjera, ndërsa autoritetet pritet të rrisin masat e sigurisë për të shmangur ndërhyrje të tilla në vazhdim.
Ndërsa Giro d’Italia shënon një kapitull historik në Shqipëri, kjo dhi e zezë do të mbetet një kujtim i pazakontë i etapës së Vlorës.
LA CAPRA VOLANTE 🐐🚴
Attraversamento inaspettato e per fortuna senza conseguenze di una capra durante il passaggio del gruppo 🙏🙏🙏#EurosportCICLISMO #Cycling #GirodItalia #Giro #Goat pic.twitter.com/AvoiEFvrB4
— Eurosport IT (@Eurosport_IT) May 11, 2025
