Më 5 prill, në Teatrin Kombëtar të Athinës, do të shfaqet vepra shqiptare “Πτήση/Κόσοβο” (Fluturimi/Kosovë) e autorit Jeton Neziraj, një komedi me theks të fortë satirik dhe politik. Kjo shfaqje e drejtuar nga regjisori shqiptar në Greqi, Enke Fezollari, tërheq vëmendjen për tema të thella që lidhen me identitetin kombëtar, pavarësinë dhe lirinë e artit në Ballkan, duke përshkruar një histori që zhvillohet brenda një teatri të Kosovës.

Vepra (Titulli origjinal: Fluturimi mbi Teatrin e Kosovës) paraqet një grup aktorësh që, gjatë provave për dramën klasike “Duke pritur Godonë” detyrohen të ndalojnë për t’u angazhuar në një projekt të ri të udhëzuar nga zyra e kryeministrit. Ky projekt ka si qëllim të tregojë historinë e Kosovës dhe të prezantohet në Ditën e Pavarësisë, një datë që mbetet e fshehtë për publikun. Gjatë këtij procesi, konflikti mes artit dhe politikës arrin kulmin, duke krijuar situata absurde dhe komike.

Personazhet janë të ndryshëm dhe të pazakontë: një aktore e ëndërron Broadway, një aktor i lodhur që luan “Lirin”, një regjisor ambicioz, një teknik skene me ëndrra heroike, një sekretar sportiv që kërkon të bëhet ministër, dhe, natyrisht, kryeministri që gjithsesi mbetet në vendin e tij. Gjatë provave dhe përgatitjeve, personazhet ndeshen me kufizimet e tyre, ambiciet dhe kontradiktat brenda vetes.

Me një pamje të mprehtë dhe të thellë, Fezollari krijon një atmosferë që është një përzierje e humorit, vetëironisë dhe kritikës politike të ashpër. “Πτήση/Κόσοβο” sjell një mesazh të fortë për luftën e përhershme mes krijimtarisë dhe propagandës politike, duke e vendosur teatrin si pasqyrë të shoqërisë dhe realitetit që jetojmë.

Në këtë shfaqje do të luajnë aktorë të njohur si Ada Giannouaki, Kyriakos Kosmides, ChrysoValantis Kostopoulos, Apostolos Malebitsis dhe Filipia Petrou, të cilët, nën udhëheqjen e Fezollarit, sjellin një eksperiencë të pasur emocionale dhe intelektuale për publikun. Pjesëmarrësit do të ndiejnë gjithashtu një energji të jashtëzakonshme përmes strukturës “teatër brenda teatrit”, ku karakteret jo vetëm që përballen me kërkesat politike të qeverisë, por dhe me veten e tyre dhe kufizimet e artit.

Pas premierës në Athinë, shfaqja do të zhvillojë një turne të suksesshëm, ku do të shfaqet në qytete të tjera të Ballkanit, si Prishtina, Mitrovica, Shkupi dhe Tirana.

Subjekti

Gati dhjetë vite pas përfundimit të luftës, Kosova, që deri atëherë po administrohej nga misioni i Kombeve të Bashkuara, bëhet gati të shpallë pavarësinë. Shteti më i ri në botë pritet të lindë pas pak. Sekretari i Ministrisë së Sportit kërkon nga trupa e Teatrit të Kosovës që të përgatisin një shfaqje teatrore solemne e cila do të jepet ditën historike të shpalljes së pavarësisë. Për festën e pavarësisë janë ndarë 2 milion euro. Trupa e teatrit ndjehen të privilegjuar dhe krenarë. Por ky ngazëllim ka edhe sfidat e veta. Pas ca kërkesave “estetike”, politikisht korrekte, trupa përballet edhe me dy “problemthe” të paparashikueshme. I pari, dita kur duhet të shpallet pavarësia mbahet sekret dhe i dyti, në shfaqje duhet të përfshihet edhe fjalimi ende i pashkruar i Kryeministrit, të cilin ai do ta mbajë në parlament në ditën historike.
Dhe derisa ekipi i teatrit fillon provat intensive, Xhejmsi, tekniku i skenës ka një projekt paralel. Ai fillon të konstruktojë një aeroplan me të cilin dëshiron të fluturojë rreth globit me qëllim që, në këtë mënyrë origjinale, të lobojë në shumë shtete të botës për njohje të shtetit të ri.
Lajmi për datën e shpalljes së pavarësisë vjen papritur. Në mbrëmje, kabineti qeveritar, mysafirë nga NATO, UN, EU dhe diplomatë të tjerë, vijnë në Teatrin e Kosovës për të parë shfaqjen – epopenë kombëtare të Kosovës. […]
Πτήση/Κόσοβο” (Fluturimi/Kosovë) (titulli origjinal: Fluturimi mbi teatrin e Kosovës) është një komedi politike mbi njërën nga ngjarjet më të rëndësishme globale të këtij shekulli – lindjen e shtetit të Kosovës.
Kjo është një komedi për Kosovën e re që, e lodhur dhe e rrënuar nga lufta, varfëria, korrupsioni dhe tutelat e pafundme të misioneve ndërkombëtare, përpiqet ta gjejë rrugën e vet drejt të ardhmes…