Kombëtarja shqiptare ka nisur zyrtarisht grumbullimin dhe përgatitjet për dy ndeshjet e para të kualifikuesve të Kampionatit Botëror 2026. Kuqezinjtë po përgatiten për sfidën e parë ndaj Anglisë, që është një kundërshtar i fortë, por futbollistët shprehen të motivuar dhe optimistë për një paraqitje dinjitoze.

Në konferencën për shtyp futbollistët Arbër Hoxha dhe Julian Shehu ndanë emocionet e tyre dhe pritshmëritë për ndeshjet e ardhshme.

Sulmuesi Arbër Hoxha e cilësoi Anglinë një kundërshtar të fortë me lojtarë të nivelit më të lartë, por theksoi se skuadra shqiptare ka cilësi dhe do të japë maksimumin në fushë.

“Ne e dimë që përballemi me një ekip të nivelit botëror, por besojmë te kualitetet tona. Do të japim maksimumin dhe shpresojmë për një rezultat pozitiv,” – tha Hoxha.

Ai u shpreh se çdo minutë në dispozicion do ta shfrytëzojë për të ndihmuar ekipin dhe për të dhënë kontributin e tij në këtë rrugëtim të rëndësishëm.

Mesfushori Julian Shehu, i cili është ftuar për herë të parë në Kombëtare, nuk i fshehu emocionet e tij dhe e cilësoi këtë moment si një ëndërr të bërë realitet.

“Isha i mpirë nga emocionet kur mora ftesën. Ky është një nga momentet më të bukura në karrierën time. Dua ta përfaqësoj Kombëtaren sa më denjësisht dhe të jap maksimumin tim,” – u shpreh Shehu.

Duke folur për rrugëtimin e tij, ai tregoi se pavarësisht një dëmtimi të rëndë sezonin e kaluar, tashmë është rikuperuar plotësisht dhe ndihet i gatshëm për të dhënë kontributin e tij.

“Viti i kaluar ishte më i vështiri për mua për shkak të dëmtimit, por tani jam 100% gati. Kam luajtur rregullisht me klubin dhe shpresoj të jap më të mirën edhe këtu,” – tha ai.

Kombëtarja ka ende disa ditë për t’u përgatitur taktikisht për përballjen me Anglinë, ndërsa trajneri dhe stafi teknik po punojnë për të analizuar kundërshtarin dhe për të përcaktuar strategjinë më të mirë.

Të dy lojtarët theksuan rëndësinë e konkurrencës brenda skuadrës, duke theksuar se ajo ndihmon për të rritur nivelin dhe për të shtyrë lojtarët të japin më të mirën në çdo seancë stërvitore dhe ndeshje.

“Konkurrenca të bën më të fortë. Secili nga ne po jep maksimumin për të fituar minuta në fushë,” – tha Shehu.

Pavarësisht vështirësisë së sfidës ndaj Anglisë, kuqezinjtë shprehen optimistë dhe të motivuar.

“Besimi është thelbësor. Ne e dimë që kemi një grup me cilësi dhe besoj se mund të arrijmë një rezultat pozitiv,” – u shpreh Hoxha.

Me një vit të suksesshëm pas, ku Shqipëria siguroi kualifikimin në Kampionatin Europian, Kombëtarja synon të vazhdojë në të njëjtën rrugë dhe të luftojë për një vend në Botërorin 2026.

Përgatitjet vazhdojnë, ndërsa ekipi pret bashkimin e të gjithë lojtarëve për të finalizuar detajet e fundit përpara sfidës ndaj Anglisë.