Në Ditën Ndërkombëtare të Gruas, shkrimtarja Rita Petro sjell një reflektim të thellë mbi pozicionin e gruas në shoqërinë e sotme. Në një realitet ku suksesi shpesh shihet përmes një prizmi të ndikuar nga stereotipat gjinorë, ajo thekson rëndësinë e pushtetit të vërtetë femëror—një pushtet që nuk dhurohet, por fitohet me punë, dije dhe integritet. Përballë sfidave të shumëfishta, si nga burrat, ashtu edhe nga gratë, çdo grua duhet të gjejë dhe të njohë forcën e saj të brendshme. Më shumë se një festë simbolike, 8 Marsi duhet të jetë një moment reflektimi dhe veprimi për barazinë e vërtetë dhe harmoninë mes burrit dhe gruas.
Pushteti i bukur femëror – Nga Rita Petro
Fuqia dhe suksesi i një gruaje ka vlerë, kur e arrin vetë atë dhe jo kur e merr si dhuratë nga burrat e pushtetshëm. Kur e fiton vetë, ajo nuk e shfrytëzon asnjëherë për të patur kontroll mbi të tjerët dhe nënshtrim ndaj atij që i detyrohet. Përkundrazi, një grua vërtet e pushtetshme e ka zbuluar, së pari, këtë forcë brenda vetes së bashku me bukurinë e feminitetit të vet. Dhe s’ka hiç nevojë të shndërrohet në një “burrë arrogant”, për të sfiduar pengesat që has çdo ditë nga stereotipat gjinorë.
Në shoqërinë shqiptare gruaja e ka dyfish vështirë, pasi kur arrin majën e suksesit dhe ka pushtet intelektual, profesional e material, sulmohet edhe nga burrat, edhe nga gratë. E kundërta ndodh me një burrë të suksesshëm, që admirohet edhe nga gratë, edhe nga burrat.
Nga ana tjetër, gratë luftojnë ashpër për vendin e parë, kur atje është një grua, ndërsa kur është aty një burrë, nuk e kanë problem që qetësisht të kalojnë në vendin e dytë.
Ndaj çdo ditë, aq më tepër sot në 8 Mars, ne duhet të ndërgjegjësohemi vetë për forcën tonë që na buron nga brenda, duke mbështetur veten dhe njëra-tjetrën, të ndërgjegjësojmë çdo burrë për ta kuptuar se lumturia në jetë varet nga harmonia mes burrit e gruas; të ndërgjegjësojmë çdo qeveri që shkon e vjen, se nuk mjafton vetëm rritja e numrit të grave në qeverisje, por të mbrojë e të ndihet përgjegjëse për çdo grua të dhunuar apo çdo jetë të humbur, të mbështetë fuqishëm shpirtërisht, kulturalisht, mendërisht e materialisht gjithçka që është e drejtë e gruas, sikurse dhe e burrit.
Gjithsesi, pushteti i bukur femëror, pavarësisht sfidave, ka kohë që po sfidon e po hap dritare, teksa heq tulla në muret që e rrethojmë shoqërinë shqiptare.
