Shoqata e Artistëve Shqiptarë në Kroaci, Dea, ka hapur një thirrje publike për shkrimtarë dhe poetë nga Kroacia, Evropa dhe mbarë bota, për të dorëzuar krijimet e tyre letrare në kuadër të “Antologjisë Letrare të Diversitetit Kulturor: Me dashuri, Dea”. Ky botim ndërkombëtar, i cili mbështetet financiarisht nga Këshilli për Pakicat Kombëtare të Republikës së Kroacisë, synon të promovojë bashkëjetesën, humanizmin, dashurinë dhe tolerancën përmes letërsisë.

Kushtet dhe kriteret e aplikimit

Sipas organizatorëve, tema e punimeve është e lirë, por do të vlerësohen në mënyrë të veçantë ato krijime që trajtojnë çështje që lidhen me harmoninë shoqërore, diversitetin kulturor dhe vlerat universale njerëzore.

Për t’u bërë pjesë e kësaj antologjie, autorët duhet të dërgojnë deri në tre punime, nga të cilat një do të përzgjidhet për botim. Punimet duhet të përmbushin këto kritere:

• Të jenë të redaktuara dhe të shkruara në alfabetin latin. Një përkthim në gjuhën kroate është i dëshirueshëm.
• Gjatësia maksimale e një krijimi: 65 rreshta, duke përfshirë ndarjet mes vargjeve ose paragrafëve.
• Formati i dorëzimit: Dokument Word (versioni 97-2003), fonti Times New Roman, madhësia 12.
• Të dhënat e autorit duhet të përfshijnë: Emrin dhe mbiemrin, qytetin dhe shtetin e origjinës, si dhe një biografi të shkurtër (deri në pesë fjali, e shkruar në vetën e tretë).
• Kontaktet personale: Adresa postare, kodi postar, vendi, numri i telefonit dhe adresa elektronike.

Afati për dorëzimin e krijimeve është 1 shkurt – 1 mars 2025, dhe punimet duhet të dërgohen në adresën elektronike [email protected].

Pas përzgjedhjes nga organizatorët, emrat e autorëve të përfshirë në antologji do të publikohen në faqet zyrtare të Shoqatës “Dea”.

Çdo pjesëmarrës i përzgjedhur do të marrë një kopje falas të botimit dhe një certifikatë mirënjohjeje për kontributin e tij letrar. Autorët duhet të mbajnë parasysh se shpenzimet e udhëtimit dhe akomodimit do të mbulohen nga vetë pjesëmarrësit.

Ata që nuk mund të jenë të pranishëm në eventin e promovimit të antologjisë, do të kenë mundësinë të porosisin një kopje të revistës për një tarifë prej 25 eurosh, deri më 1 maj 2025. Pas këtij afati, organizatorët nuk mund të garantojnë ruajtjen e kopjeve të pablerë.

Një mundësi për krijuesit letrarë

Shoqata “Dea” e konsideron këtë projekt si një platformë të rëndësishme për promovimin e diversitetit kulturor dhe letërsisë ndërkombëtare, duke inkurajuar krijuesit që të ndajnë zërin e tyre me një audiencë më të gjerë. Përmes kësaj antologjie, autorët do të kenë mundësinë të shprehin përmes vargjeve dhe prozës tematika me ndikim të gjerë, që prekin jetën e përditshme dhe realitetet shoqërore në vende të ndryshme të botës.

Me këtë nismë, Shoqata “Dea” në Kroaci synon të krijojë një urë lidhëse mes kulturave dhe të mbështesë letërsinë si një formë të fuqishme të komunikimit dhe integrimit ndërkombëtar. Për të gjithë krijuesit letrarë, kjo është një mundësi e rëndësishme për të marrë pjesë në një botim me shtrirje globale dhe për të dhënë kontributin e tyre në pasurimin e letërsisë bashkëkohore.