Manifestimi filloi me intonimin e Himnit Kombëtar. Salla e stërmbushur me mërgimtarë ishte stolisur me flamuj e piktura, si dhe me foto të burrave të mëdhenj të kombit, veprimtaria e të cilëve ndërlidhej me këtë datë tonën historike. Manifestimin e hapi moderatori Vehbi Haliti, i cili u uroi mirëseardhje të pranishmëve dhe i përgëzoi për këtë festë. Në vazhdim ai shkurtimisht foli për rëndësinë e 28 Nëntorit dhe për pavarësinë e Shqipërisë. Ai rikujtoi se në ditën e 28 nëntorit të vitit 1912 në Vlorën heroike, patrioti i mençur i kombit tonë, heroi i popullit Ismail Qemail Vlora, shpalli pavarësinë e Shqipërisë dhe ngriti flamurin kuqezi.
Prandaj, këtyre ditëve në çdo vend ku jetojnë e punojnë shqiptarët festohet kjo datë e jona historike që lidhet me Ditën e Flamurit Kombëtar dhe me Ditën e Pavarësisë së Shqipërisë, si dhe rikujtohet se 28 nëntori shënon edhe ditën e daljes së parë publike të pjesëtarëve të UÇK-së dhe ditëlindjen e komandantit legjendar Adem Jashari. Moderatori pastaj ia dha fjalën kryetarit të Shoqatës Humanitare Kulturore Sportive Shqiptare ,,Atdheu” në Grac Austri, zotëri Bashkim Shala, i cili poashtu u dëshiroi mirëseardhje të pranishmëve dhe i përgëzoi për këtë festë. “Të nderuar vëllezër e motra, zonja dhe zotërinj, të dashur fëmijë, të rinj dhe të reja, familje dhe veprimtarë, mirë se keni ardhur në festën e madhe të Ditës së Flamurit Kombëtar dhe të 110-vjetorit të pavarësisë të shtetit shqiptar.
Të nderuar udhëheqës dhe anëtarë të kryesive të shoqatave shqiptare që veprojnë në Austri, ju faleminderit që jeni prezentë këtu që këtë kremte për 28 Nëntorin – Ditën e Flamurit Kombëtar ta kalojmë së bashku dhe nga këtu të përcjellim urimin tonë të përbashkët për të gjithë mërgimtarët shqiptarë kudo që janë. Falënderojmë Kryesinë e Shoqatës Humanitare Kulturore Sportive Shqiptare ‘Atdheu’ në Grac që me përkrahje financiare ndihmoi në vazhdimësi.
Një falënderim i veçantë edhe për shoqatat dhe aktivistët e diasporës shqiptare në Austri” – theksoi zotëri Bashkim Shala, Moderatori z.Vehbi Haliti, në emër të Shoqatës Humanitare Kulturore Sportive Shqiptare ,,Atdheu” në Grac, përshëndeti edhe mysafirët e nderit që ishin të pranishëm nga Shoqata Kulturore ,,Rinia” në Grac, pastaj Miftar Zagragjen nga Shoqata Kulturore Sportive Shqiptare ,,Mergimi” në Steyr, Shoqatën “Internationale” në Kapfenberg të Austrisë me kryetarin, z. Naim Sadiku, me anëtarët e Kryesisë Vehbi Haliti. Nga Shoqata ,,Atdheu“ zotëri Artan Kabashin. Një përshëndetje të veçantë e pati për zotri Rifat Krasniqi, Remzi Feka e Liridon Ademi, si dhe për veteranen e arsimit,zonjën. Bukurije Limani.
Manifestimi vijoi me një program të pasur kulturor-artistik të përgatitur nga shoqatat “Rinia” dhe “Atdheu“ të Gracit. Mbresa të veçanta la këndimi i tri vajzave në përcjellje me qefteli nga babai i tyre, z. Zenun (Bajram) Gashi, si dhe grupi i valleve me koreografen Xhejlane Raqa.
Begati e programit ishin edhe këngëtaret e mirënjohura, Maria Lajçaj dhe Bardhe Gega, por edhe disa recitime, këngë dhe valle, të cilat i dhanë ton të veçantë programit dhe morën duartrokitje të shumta nga të pranishmit, të cilët mirëpritën prezantimin e një thesari të çmuar kulturor të trashëgimisë tonë kombëtare. Aktivistët tanë nga mërgata të tubuar në Shoqatën Humanitare Kulturore Sportive Shqiptare ,,Atdheu” në Grac meritojnë respekt për punën e tyre me shumë përkushtim dhe për kontributin konkret për t’i bashkuar në një rast kremteje shqiptarët nga shoqatat shqiptare nga e tërë Austria për nder të festës së 28 Nëntori – Ditës të Flamurit Kombëtar. Fakti se salla ku u organizua ky manifestim ishte e mbushur përplot (kishte mbi 180 bashkatdhetarë) dhe atmosfera gëzmore që mbretëroi dëshmon se organizimi i shqiptarëve kudo në diasporë është i domosdoshëm si parakusht tejet i rëndësishëm për ruajtjen e identitetit tonë kombëtar, gjuhës, kulturës dhe traditës shqiptare. Roli i mërgatës shqiptare për Kosovën dhe trojet shqiptare ka qenë dhe mbetet shumë i rëndësishëm, sepse këta njerëz të vyeshëm gjithçka që kanë bërë, e kanë bërë në emër të përkushtimit për atdheun e tyre. Urojmë që kjo ditë kremteje të jetë një mesazh i fuqishëm për të gjitha forcat politike të kombit tonë, për angazhim më të madh në çështjet madhore drejt progresit dhe interesave imediate të kombit tonë./ Bota Sot/
Nga MIFTAR ZAGRAGJA
