Është ndarë nga jeta ditën e djeshme gazetari i njohur shqiptaro-amerikan, Sulejman Gashi.

I ndjeri ishte një nga themeluesit e gazetës “Illyria”, në qershor të vitit 1991, redaktor që nga dita e parë e bashkëpunëtor i ngushtë deri në fund të jetës.

Në vitin 2013, ai drejtoi Darkën kushtuar 5-vjetorit të Pavarësisë së Kosovës të shtruar për komunitetin nga gazeta “Illyria”.

Si gazetar i “Illyria”-s ai mbuloi ngjarjet më të mëdha në Washington, sidomos në gjysmën e parë të viteve 1990, duke raportuar me besnikëri dhe profesionalizëm të lartë.

“Kjo është një humbje e madhë për familjen, komunitetin dhe gazetarinë shqiptare”, tha pasi mësoi lajmin e vdekjes, botuesi i gazetës “Illyria”, Vehbi Bajrami. “Kontributi i tij çmuar në themelimin e gazetës, në ngritjen e saj dhe vitet e para nuk do të harrohet. Punuam bashkë për shumë vite në redaksinë e gazetës nga edhe ruaj shumë kujtime të bukura”.

Lajmin për humbjen e Sulejmanit e dha me një shënim në Facebook, djali i tij Drilon Gashi, një nga veprimtarët e rinj më të njohur të komunitetit. Mund ta lexoni të plotë më poshtë. Sulejmani la pas katër fëmijë dhe bashkëshorten e tij. Në vitin 2016 pësoi një infarkt ndërsa udhëtonte më nje delegacion zyrtar të Kosovës në Utah. Për kthimin e tij pranë familjes dhe vazhdimin e kurimit, ndihmoi mbarë komuniteti duke mbledhur dhjetëra mijëra dollarë. Ishte një shembull ilustrues i mirënjohjes për punën e tij gazetari të njohur. Për fat të keq, nuk arriti të merrte veten nga koma ku kishte rënë.

Sulejman Gashi e filloi karrierën e tij në Radio Televizionin e Kosovës. Pas mbylljes së tij nga autoritetet serbe në 1990, ai emigroi në SHBA, ku u përfshi në punën për themelimin e gazetës Illyria. Pas çlirimit të Kosovës dhe rifillimit të RTK-së ka shërbyer edhe si korrespondent për Radio Televizionin e Kosovës, e për media të tjera nga Kosova si dhe në kapacitete të ndryshme ka përfaqësuar e ndihmuar në përfaqësimin e shtetit të ri të Kosovës në SHBA. Shpesh ishte në krah të zyrtarëve të lartë si përkthyes, si këshilltar si gazetar, kronist, e në çfarëdo pozite që të kishte nevojë Kosova e tij e dashur.

Me të njëjtën dashuri për atdheun ka rritur edhe fëmijët e tij që kanë ecur përpara në jetë dhe kanë mbetur të angazhuar me kauzën e punën në komunitetit.

Në vitin 2013, duke drejtuar Darkën e 5-Vjetorit të Pavarësisë së Kosovës, organizuar nga gazeta “Illyria”, në New York.

Të dashur familjarë dhe miq,
Me pikëllim të thellë ju njoftojmë që sot, me 11 shtator 2020, ndërroi jetë më i dashuri ynë z. Sulejman Gashi. Ai po luftonte shumë që të rikthehej nga gjendja e rëndë që kishte pësuar katër vite më parë.
Varrimi i të ndjerit do të bëhët në vëndlindjen e tij në Kosovë, vendin të cilin ai e deshi aq shumë. Sulejman Gashi bëri një jetë, dhe la një vepër, me domëthënie të jashtëzakonshme për familjen, profesionin, vendin dhe kombin e tij.
Në ditët në vijim do të ju japim informata të mëtutjeshme. Ne jemi mirënjohës për respektin dhe dashurinë që njerëzit e kanë për më të dashurin tonë, Sulejmanin, por ju lusim që bashkërisht të respektojmë masat e shëndetit publik në këtë kohë pandemie.
Ju jemi mirënjohës për respektimin e privatësisë sonë në këtë kohë tejët të vështirë për familjen dhe farefisin tonë.
Me respekt,
Familja e z. Sulejman Gashi