Mark Crawford, investitor dhe ish-presidenti i Dhomës Amerikane të Tregtisë, mendon se krijimi i bursës së Shqipërisë do të ishte një mundësi e mirë për të tërhequr investitorë. Ai tregoi në një intervistë se investitorë të ndryshëm kanë shprehur interes për Shqipërinë.
Sipas tij, kompani si UKT, apo ato të naftës, mund të ishin një fillim i mirë për bursën shqiptare.
“Duhet që të kemi bursën në Shqipëri, por për momentin është si të kemi një stadium dhe lojtarët janë të gjithë gati, por s’kemi top. Na duhet topi. Qeveria mund të na ndihmojë për të listuar një pjesë të vogël të kompanive shtetërore, për të filluar”, tregon Crawford.
Ai tregon edhe ndryshimin mes fondeve të investimit dhe depozitimit të parave në bankë. “Nga fondet e investimit mund të kesh një normë fitimi 7%, disa herë deri edhe në 15%, ndërsa nga paratë e depozituara në banka mund të marrësh 1-2, ose 3%. Megjithatë, ne i këshillojmë investitorët që “të mos i fusin të gjitha paratë në një thes”, por të diversifikojnë investimin. Nëse investon përmes një fondi ka më pak risk se sa të investosh online, direkt në një aksion të kompanisë”, thotë ai.
“Unë jam i investuar në bursa ndërkombëtare dhe do të qëndroj aty, besoj që është një moment për të investuar aty, sidomos në fondet më të sigurta. Por besoj se do të jetë mundësia edhe për të investuar direkt në disa biznese që kanë nevojë për likuiditet. SHBA-ja nuk është as në mes të krizës, është akoma në fillim, besoj. Kështu që mund të ketë mundësi”.
Burimi origjinal, këtu:
