Ventrilokuizmi është një disiplinë pak e njohur në Shqipëri, por në Amerikë është një nga format më popullore të shfaqjeve artistike. Një personazh dhe një kukull bisedojnë me njëri-tjetrin, argëtohen dhe thumbojnë. Është mënyra e tyre e komunikimit ajo që dallon ventrilokuizmin nga format e tjera të artit skenik.

Termi vjen nga fjalët latine “venter” që do të thotë bark dhe “loqui” që do të thotë të flasësh.

Ventrilokuisti shpesh krijon një personazh dhe pastaj paraqet një dialog midis vetes dhe kukullës, duke i bërë shikuesit të duken sikur zërat vijnë nga personazhe të ndryshëm. Aftësia kërkon koordinim të ngushtë midis lëvizjeve të buza dhe mënyrës së fjalimit për të krijuar iluzionin se zëri vjen nga një burim tjetër.

Nikolas Bushi është artisti shqiptarë që jeton në SHBA dhe ka zgjedhur të bëhet ventrilokuist. Shumë punë, pasion dhe sakrificë për të arritur ëndrrën: Të performoj në të gjitha skenat më të njohura nëpër botë.

Intervistoi Aleksandër Rena 

Përshëndetje Nikolas dhe Chris, kënaqësi që ju kam në këtë intervistë si dyshen më simpatike shqiptare të ventrilokuizmit në botë! Si ndihesh të jesh një ventrilokuist i vlerësuar me disa çmime? A ka ndikuar kjo në jetën tënde të përditshme?

Ndjehem shumë i kënaqur dhe krenar për ku kam arritur, por kam edhe shumë punë për të bërë për të arritur në nivelin ku unë dua të jem për të prekur skenat më të mëdha në botë! Po ka ndikuar, jam më i fokusuar tek kjo jo vetëm si pasion por si punë dhe e praktikoj disa orë në ditë sepse kërkon shumë punë për të arritur qëllimet  që i kam vënë vetes.

Si u zbulua talenti yt dhe kush kanë qenë shtysat kryesore drejt këtij suksesi?

E kam parë ventrilokuizmin për herë të parë në “America’s Got Talent” dhe më pëlqeu shumë. U shpreha prindërve dëshirën time dhe i pyeta nëse mund të më blinin një kukull dhe libra për të studiuar dhe mësuar mbi ventrilokuizm dhe që atëherë nuk kam ndalur asnjë ditë duke e praktikuar. Familja ime ka besuar tek unë dhe kanë qene shtysa ime kryesore. Më kanë ndihmuar shumë, dhe më kanë qëndruar pranë gjatë këtij rrugëtimi, ku dhe gjej mundësinë ti falenderoje për mbështetjen e madhe që kam gjetur tek ata. Për këtë  u jam shumë mirënjohës që më besuan.

Çfarë marrëdhëniesh ke me Chris dhe a e do atë më shumë se kukullat e tjera?

Me Chris ndonjëherë zihemi dhe pajtohemi nuk rrimë dot pa njëri-tjetrin! Kam dhe shumë kukulla të tjera që i përdor, por me Chris jam bërë më shumë i njohur që në daljet e mia te para, karakteri i tij është shumë interesant dhe pëlqehet shumë nga gjithë publiku!

Cilat janë objektivat e tua për të ardhmen?

Të pushtoj skenat botërore, ky është objektivi që i kam vënë vetes! Punoj dhe do vazhdojë të punojë sa më shumë, sepse nuk është e lehtë të arrij të performoj në të gjitha skenat më të njohura nëpër botë. Dua të jem më i miri në ventrilokuizmin, nuk është e lehtë por më dëshirën që do ja arrijë!

Një tjetër nga talentet e tua është dhe sporti (futbollin), e ke menduar ndonjëherë të lësh ventrilokuizmin përgjithmonë dhe të merresh vetëm me futboll?

Talenti për sportin nuk më ka dhënë ndonjëherë dyshime për të ndërruar karrierën time. Kam pas luajtur më një ekip që në moshën 6 vjeçare dhe në fillim kisha  ëndërr të bëhesha futbollist por mbas disa viteve pasi zbulova një tjetër talent timin ventrilokuizm, dhe duke e praktikuar çdo ditë padiskutim është e qartë për mua se cila është ëndrra që do ndjek drejt karrierës time.

Pas shumë vitesh a do vazhdojmë ta shohim Nikolasin me Chris apo do të kemi risi te tjera?

Nuk e di se çfarë do të ndodh pas disa vitesh, ndoshta është Chris që nuk do të punojë më me mua (qesh)!

Por është një personazh që e dua shumë dhe kemi një lidhje shume të ngushtë dhe të veçantë së bashku! Do të kemi risi të reja por është shumë akoma herët për të folur, le ti lëmë disa surprizë!

Çfarë marrëdhëniesh ke me prindërit, a janë ata pjesë e suksesit tënd?

Prindërit janë mbështetja ime më e madhe, gjithmonë pas meje në gjithë rrugëtimin tim si ventrlokuest! Më kanë mësuar dhe kanë kontribuar në karrierën time.

Chris padiskutim që është kukulla më simpatike që ke pasur ndonjëherë, a do t’a ndërroje atë me ndonjë kukull tjetër nëse do të të binte akoma dhe më cilësore?

Jo nuk do e ndërroja ndonjëherë sepse ai është bërë një pjese e historisë time. I vetmi ndryshim do ishte po të bëja një Chris të personalizuar për mua që të njihet si kukulla dhe karakteri im personal.

Duke të të uruar shumë suksese në karrierën tënde si ventrilokuest dhe jo vetëm, cili do ishte mesazhi yt për mbështetësit e tu?

Jam shumë me fat që njerëzit më ndjekin dhe më mbështesin, u them shumë faleminderit për gjithë  suportin. Uroj që performancat e mia live apo kudo që të dal të ndikojnë pozitivisht në jetën e tyre të përditshme. Shumë faleminderit, mirënjohje!