Ornela Dardha është shkencëtarja shqiptare, lektore e lartë në shkencat kompjuterike në Universitetin e Glasgow, që është dekoruar nga qeveria italiane me çmimin e ‘Science. She says’, duke u vlerësuar si “Shkencëtarja e re femër me arritje personale të jashtëzakonshme”.
Në një lidhje me Skype për “ABC e Mëngjesit”, Ornela ka treguar se çmimi iu dha nga Ministria e Punëve të Jashtme të Italisë, ku mes femrave nga e gjithë bota, ajo u zgjodh më e mira në Evropë. Gjatë bisedës, ajo zbuloi se ka mbaruar studimet bachelor dhe master për informatikë në “La Sapienza”, ndërsa doktoraturën e ka përfunduar në Universitetin e Bologna-s.
“Ky çmim u dha nga qeveria italiane, më konkretisht nga Ministria e Punëve të Jashtme. I jepet një gruaje, një vajze jo italiane që jeton jashtë Italisë dhe që ka kontribuar në mënyrë të jashtëzakonshme në shkencë, në inovacion apo teknologji, edhe ka lidhje të ngushta me Italinë. Në këtë çmim u përfshinë të gjitha fushat e shkencave, jo vetëm informatika që është dega ime. U dhanë 5 çmime, dmth një për rajon dhe unë e fitova për Europën.
Rëndësia e këtij çmimi është të vendosim në vendet kryesore gratë dhe rolin e grave në shkencë dhe teknologji se zakonisht janë degë, fusha që konsiderohen mashkullore.-përfundoi ajo.
