Festivali Kombëtar i Kulinarisë, Bujtinave dhe Prodhuesve Vendorë çeli ditën e djeshme edicionin e tij të parë. Në ambientet e Presidencës u organizua edhe një panair me produkte tipike lokale të zonave të ndryshme të Shqipërisë. Organizator i këtij evenimenti ishte Shoqata e Restoranteve Turistike Shqiptare e cila kishte zgjedhur këtë ditë për të bërë publik edhe bashkëpunimin me Dhomën e Biznesit të Diasporës Shqiptare. Marrëveshja e cila u nënshkrua në prani nga z.Demir Hoxha, anëtar themelues dhe anëtar i Asamblesë së Dhomës së Biznesit të Diasporës Shqiptare dhe z. Kujtim Dervishi, kryetar i Shoqatës së Restoranteve Turistike Shqiptare.

Janë me qindra restorantet, bujtinat, hanet e komplekset turistike dhe hoteliere në Shqipëri të cilat çdo vit mirëpresin dhe u shpërbejnë mijëra shqiptarëve të Diasporës të cilët zgjedhin vendlindjen për të pushuar ose kthehen për vizitë, ndaj edhe ky bashkëpunim u konsiderua i vlefshëm nga të dyja palët. Jo vetëm për të rritur cilësinë e shërbimeve por edhe për eksploruar, përmirësuar dhe mbështetur sipërmarrjet që kanë në fokus të dyja palët.

Dhoma e Biznesit të Diasporës Shqiptare si një organizatë e konsoliduar tashmë dhe më një rrjet të gjerë bashkëpunëtorësh do të ndihmojë në përpilim dhe kërkim fondesh dhe zbatim të projekteve si dhe do të përfshijë anëtarët e Shoqatës në trajnimet pa pagesë organizuar nga Dhoma.

Gjithashtu do të ketë shkëmbime të vazhdueshme të interesave të subjekteve shqiptare dhe atyre në Diasporë si dhe bashkëveprim në studime dhe analiza sektoriale, e mentorim dhe këshillim nga Sipërmarrjet e Diasporës për anëtarët e Shoqatës.

Me rëndësi është edhe roli i Dhomës së Biznesit të Diasporës në krijimin e binjakëzimeve në fushën e gastronomisë me Shoqata apo ente të ndryshme homologe të shqiptarëve në Diasporë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.