Kryeministri Edi Rama jep lajmin e mirë për të gjithë shqiptarët që jetojnë në Itali dhe që kanë kontribute pune në vendin fqinj.
Rama shkruan në “Facebook” se qeveria italiane ka përfshirë në projekt-buxhetin e Italisë për vitin 2022 edhe një amendament për nisjen e procesit të njohjes faktike të pensioneve të shqiptarëve.
Mesazhi i Ramës:
LAJM I MIRË për shqiptarët në Itali
Në vazhdën e komunikimit me qeverinë italiane dhe partitë politike për marrëveshjen e pensioneve, Parlamenti Italian ka përfshirë në projek-buxhetin e Italisë për vitin 2022 edhe një amendament për nisjen e procesit të njohjes faktike të pensioneve të shqiptarëve me kontribute pune në vendin mik👍 Vazhdojmë kontaktet deri në aprovimin përfundimtar të projekt-buxhetit 2022 dhe me këtë rast u shpreh mirënjohjen në emër të shqiptarëve në Itali, kryeministrit Mario Draghi, ministrit të jashtëm Luigi di Maio, të cilët janë angazhuar personalisht për ta zgjidhur këtë çështje kaq jetike për aq shumë shqiptarë të mirë në Italinë mike, si edhe të gjithë të tjerëve që dashamirësisht janë përfshirë në këtë përpjekje të përbashkët🇦🇱❤️🇮🇹
Me këtë status kryeministri Rama ka konfirmuar gatishmërinë e shtetit shqiptar për të mbyllur marrëveshjen për njohjen e pensioneve me vendin fqinj.
Pak ditë më parë “Diaspora Shqiptare” publikoi të plotë reagimin e senatorit Tommaso Nannicini pas miratimit në ligjin e buxhetit italian fondin specifik për përcaktimin e marrëveshjes së pensioneve ndërmjet Italisë dhe Shqipërisë.
“Një fakt thelbësor ndryshon: tani ka një fond të dedikuar për këtë marrëveshje specifike. Fondi parashikon një alokim vjetor duke filluar nga viti 2023 dhe për të gjitha vitet në vijim për të bërë funksionale marrëveshjen dypalëshe. Ne lamë mënjanë alibitë, tani paratë janë aty dhe koha për të mbyllur marrëveshjen mund të jetë shumë më e shkurtër.
Shpresoj që në janar 2022, Italia dhe Shqipëria të mund të punojnë shpejt për marrëveshjen. Në raportin teknik që shoqëron amendamentin tim ka tashmë një draft me pikat kyçe që duhen përfshirë.
Tashmë mjafton të mbledhim tabelën teknike, ta ndajmë, ta nënshkruajmë dhe ta ratifikojmë nga të dyja shtetet. Tani 2022 mund të jetë vërtet viti i konventës dhe nga ana ime do të bëj gjithçka që kjo të ndodhë”, është shprehur ndër të tjera Nannicini.
Lexo edhe: Italia miraton fondin për pensionet e shqiptarëve
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
