Dhoma e Biznesit të Diasporës Shqiptare, Unioni i Sipërmarrësve të Rinj shqiptar dhe Organizata “Germin” zhvilluan ditën e sotme një takim me fokus kryesor bashkëpunimin.

Dhoma e Biznesit të Diasporës dhe “Germin” si dy aktorë me peshë në çështjet e Diasporës dhe Unioni i Sipërmarrësve të Rinj si një organizëm mbështetës për sipërmarrësit e rinj jo vetëm nga Shqipëria pro edhe nga Diaspora.

Kryetari i Dhomës së Biznesit të Diasporës, Ardian Lekaj gjatë takimit theksoi rëndësinë e bashkëpunimit mes organizatave qe punojnë për rritjen e investimeve dhe përfshirjen e Diasporës në zhvillimin e vendit.

Ndërsa Lirim Krasniqi Drejtor Co-Executive i “Germin” u shpreh i gatshëm për të bashkëpunuar në evidentimin e burimeve të ndryshme të financimit, veçanërisht në sipërmarrjet me pronësi dhe të administruara nga shqiptarët në vende të ndryshme të botës si Gjermani, Austri etj.

Kryetarja e Unionit të Sipërmarrësve të Rinj Elisabeta Katiaj prezantoi projektin më të ri të Dhomës së Biznesit të Diasporës “Fluturo me Shqipen”.

Një projekt me qëllim kryesor evidentimin e  rëndësisë së produkteve “Made in Albania” dhe promovimin e tyre, si dhe mbështetjen për krijimin e një zinxhiri nga prodhimi deri në penetrimin drejt tregjeve rajonale dhe drejt konsumatorit shqiptar në Diasporë. Sipërmarrja e Diasporës zotëron kapacitetin e duhur për të ardhur në ndihmë të fuqizimit të produkteve lokale nëpërmjet forcimit të Brandit Shqiptar. Përveç të tjerash, kjo iniciativë do të ndikojë pozitivisht në sektorin e punësimit dhe rritjen e të ardhurave dhe rrjedhimisht një ekonomi të qëndrueshme.

Gjatë takimit gjithashtu u bisedua edhe për një kalendar të përbashkët aktivitetesh për vitin 2022.