Lëvizja “Diaspora për Shqipërinë e lirë” ka zgjedhur një ditë simbolike për tw prezatuar projektin e tyre më rë ti “Mentoria”. 8 dhjetori është dita e rinisë, dhe pikërisht ky është edhe grupi të cilëve “Mentoria” u dedikohet.
“Një nga qëllimet e Diaspora për Shqipërinë e Lirë, është të nxisë dhe mbështesë shkëmbimin e njohurive dhe eksperiencave midis profesionistëve të Diasporës dhe Shqipërisë. Ajo çka e bashkon visarin e anëtarëve të lëvizjes tonë është raporti i tyre i ngushtë me vendlindjen si dhe dëshira e madhe për të dhëne një kontribut për Shqipërinë. Duke u nisur nga kjo ndjenjë, lindi motivimi dhe ideja e programit “Mentoria”, si platformë e shkëmbimit dhe ndarjes së eksperiencave profesionale midis profesionistëve të rinj në Diasporë dhe studentëve / studenteve në Shqipëri.
Sipas Herodotit, Mentorët ishin një fis ilir Liburnian që jetonte në bregdetin Adriatik. Ndërkaq vendbanimin e tyre me emrin Mentoria e përmend edhe filozofi e mësuesi i madh Aristoteli. Kjo është arsyeja pse ky program mentorimi bart emrin “Mentoria”” shkruhet në njoftim.
Ekipi i projektit me tej sqaron: “Një rol kyç në përballjen e sfidave si dhe në suksesin tonë akademik dhe profesional jashtë Shqipërisë kanë luajtur padyshim dhe udhërrëfyesit apo mentorët tanë, të cilat / cilët me këshillat dhe rrjetin e tyre na kanë ndihmuar dhe kanë lehtësuar rrugëtimet tona individuale. Të qënurit të mentoruar në vendet ku jetojmë dhe lidhja e ngushtë me Shqipërinë, ku shumë prej nesh kanë kryer një pjesë të studimeve, na ngarkon me përgjegjësinë dhe motivimin për ti vënë njohuritë tona në dobi të të rinjve shqiptarë. Ne besojmë se mentorimi është një raport dykahësh. Për këtë arsye jemi të bindur, se të gjithë do të mësojmë dhe përfitojmë nga shkëmbimi i ndërsjelltë me njeri-tjetrin”.
Shtatë pika kyçe për të sjellë në vëmendje:
1) Kush mund të aplikojë? Studentët e universitetit të nivelit Master/Doktoraturë dhe profesionistet e rinj në vitet e para të karrierës së tyre profesionale;
2) Kriteret për të aplikuar? Mjafton një dëshirë e mire dhe motivimi për tu përmirësuar dhe investuar në rritjen profesionale e personale.
3) Afati kohor? Afati për aplikim nis nga sot dhe mbyllet me datë 23 Dhjetor 2021. Të interesuarit janë të lutur të aplikojnë nëpërmjet faqes sonë në web: www.takonjementor.com, ku gjendet detaje mbi atë çfarë ne ofrojmë.
4) Ekspertiza e mentorëve tanë përfshin fushat: ekonomi, biznes, teknologji, psikologji, inxhinieri telekomunikacioni, shkenca politike dhe energjitike.
5) Për çdo pyetje dhe paqartësi në lidhje me pritshmëritë e programit, ju ftojmë të na kontaktoni përpara aplikimit nën adresën e emailit: [email protected]. Dikush nga ekipi do tju përgjigjet brenda 3 ditëve nga marrja e emailit tuaj.
6) Me të gjithë të përzgjedhurit për mentorim do të zhvillohet një webinar, për të dhënë më shumë detaje mbi strukturën dhe pritshmëritë e programit si dhe për t’ju përgjigjur pyetjeve apo paqartësive para lansimit zyrtar të programit në fillim të Janarit 2022.
7) Programi “Mentoria” është projektuar si fillim për 6 muaj. Ne fund të 6 mujorit, ekipi organizativ do të mblidhet për të vlerësuar (i) impaktin e bërë (ii) interesin e treguar dhe (iii) mundësitë e skuadrës së mentoruesve për të vazhduar kontributin e tyre vullnetar. Në varësi të këtyre treguesve do të përcaktohet strategjia në vijim.
Ekipi fton të gjithë të rinjtë të aplikojnë për programin “Mentoria” duke theksuar padurimin për bashkëpunimin.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
