Panairi i Librit rikthehet në formën e tij tradicionale pas një viti ndryshe të diktuar nga pandemia. Nisi sot më datë 17 nëntor për të vijuar deri më datë 21 të këtij muaji. Në Pallatin e Kongreseve për disa ditë më radhë ekspozim librash, vizita në panair, promovime, biseda me shkrimtarë, përkthyes, lexues, diskutime, dhënie çmimesh e të tjera janë këtë edicion të 24 të panairit. Këtë vit rreth 95 botues nga Shqipëria, Kosova, nga Maqedonia e Veriut dhe Mali i Zi do të jenë në Pallatin e Kongreseve.

Pjesë e Panairit është edhe shkrimtari i njohur shqiptar i cili prej vitesh jeton në Kanada, Kristaq Turtulli. Turtulli prezanton në panair 4 libra të tij: Saga e Madhe Shqiptare, në dy libra: “Zëra në Lavjerrës” dhe “Zëra në Humbëtirë”. Gjithashtu romani “Përroi qantë në mesnatë” dhe libri me tregime dhe novella “Litari i Mallit”.

Kristaq Turtulli është shkrimtar i mirënjohur, ndër më cilësorët e aktivët shqiptarë që jetojnë në Kanada, ndërsa qeveria shqiptare duke vlerësuar rolin e tij intelektual, para dy vitesh ia ka ndarë titullin “Ambasador i Kombit”. Turtulli ka filluar të shkruajë dhe të botojë në moshë fare të re; poezi, tregime, novela, romane, me shumicën e të cilave vlerësohet edhe me çmime kombëtare. Kristaqi emigroi në Kanada në fillim të vitit 2000, rrugëtim që nuk e pengoi, por me këmbëngulje dhe pasion vazhdoi të shkruante si rrallë tjetër, të botojë dhe të promovojë librat e tij në Shqipëri, Kosovë, Francë, Greqi, Itali si edhe në vendin ku tashmë jeton prej vitesh në Kanada. Krijimtaria e tij është dhe vlerësuar dhe vazhdon të vlerësohet dhe të botohet në gjuhën angleze, në Shtetet e Bashkuara të Amerikës si romanet “The Inn with two doors”, “ Ivory Eye”, Mysteries of Little Paris” dhe “Friends”.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.