Klasa e mësimit të gjuhës shqipe dhe mësimit plotësues “Frang Bardhi”, Iraklio, Kretë, Greqi, nisi vitin e ri shkollor 2021-2022.

Për të dytin vit radhazi, mësueset Jerida Kulla dhe Klarita Selmani, hapën klasën e gjuhës shqipe dhe të mësimit plotësues “Frang Bardhi”, në Iraklio të Kretës.

Është viti i dytë i mësimit online. Pavarësisht vështirësive dhe mungesës së klasës fizike, këto mësuese nuk u tërhoqën, por nisën vitin e ri shkollor 2021-2022, me më shumë përgjegjësi e me më shumë dëshirë, për të vetmin qëllim: fëmijët që jetojnë në Greqi, të kenë mundësi të shprehen e të ndihen shqiptarë.

Kujtojmë se këto mësuese janë 2 mësueset që hapën për herë të parë klasën e gjuhës shqipe në vitin 2017, në Iraklio të Kretës, Greqi. Përpjekjet dhe puna e tyre vazhdon, pasi pasioni për mësimdhënien është i madh dhe zbeh vështirësitë, duke i kaluar pengesat me forcën e dashurisë për gjuhën shqipe dhe atdheun.

Të pranishëm në këtë ditë ishin, prindërit, nxënësit, vëllezërit e motrat e tyre.

Në ditën e parë u bë një panoramë e shkurtër se si do të zhvillohet mësimi, cilët do të jenë librat që do të përdoren, tematikat e ndryshme që do të trajtohen. Duke qenë se mësimi do të zhvillohet online, janë përzgjedhur metodat bashkëkohore që fëmijët ta ndjekin me gëzim mësimin e të mësojnë duke u argëtuar, të mësojnë e të njihen më zakonet e traditat e popullit shqiptar.

Tekstet mësimore u mundësuan nga Qendra e Botimeve të Diasporës (QBD).

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.