“Po Dibrës Jo Skavicës” bashkon zërat e Dibranëve në Nju Jork.
Pranë ndërtesës së OKB-së, në Manhattan, ditën e Enjte (4 Nëntor) dhjetëra qytetarë shqiptaro -amerikanë protestuan për mbrojten e Luginës së Drinit të Zi dhe Dibrës, nga përmbytja që i shkakton ndërtimi i Digës së Skavicës, mbi Lumin më të gjatë në Shqipëri, Drini i Zi .
Protesta, ishte e organizuar nga aktivistët e komunitetit Dibran, në zonën e Tri-Shteshit, (New York, New Jersey, Connecticut) në mbështetje nga Organizata Albanian Roots – Rrënjët Shqiptare .
Kjo protestë që është e para e këtij lloji organizuar nga komuniteti shqiptar në SHBA, u mbajt në sheshin e njohur të protestave në Dag Hammarskjold Plazza (333 E 47th Street) Manhattan për ti dhënë zë të drejtës së dhunuar të dibranëve pranë institucioneve amerikane.
Protesta ishte paqësore dhe plotësisht konform rregullave të qytetit.
Po Dibrës, Jo Skavicës i cili është dhe motivi i kësaj proteste ka startuar pikërisht pranë OKB- së në Nju Jork si një valë kundërshtimi dhe proteste kundër zbatimit të projektit të Digës së Liqenit të Skavicës.
Një liqen ky i cili bazuar nga studimet e eksperteve zhduk nga harta disa fshatra të Dibrës duke përmbytur bashkë me ta histori, tokë bujqësore dhe mjaft pasuri të tjera.
Skavica është kundërshtuar sistematikisht nga zëra dinjitozë të historisë , studime arkeologjike, gazetarë e analistë, individualitete dhe aktivistë, përfshirë studiuesin dhe historianin Adem Bunguri, gazetarin e profesorin e njohur dibran në Athinë, zotin Abdurahim Ashiku i cili i ka kushtuar një libër voluminoz me titull “ Po Dibrës Jo Skavicës “ .
Protesta e Nju Jorkut është iniciuar nga një grup të rinjsh dibranë në Amerikë ; Forca Korabi me drejtues aktivistin Agron Damzi, dhe Blendi Bekteshi me një mbështetjeje të madhe edhe nga Albanian Roots dhe presidenti i saj Marko Kepi,
Protesta Po Dibrës – Jo Skavicës ka gjetur përkrahjen e dhjetëra qytetarëve dibranë në zonën e Tri-Shtetshit mirëpo jo vetëm, të cilët me banderola e flamuj shqiptaro – amerikanë i thanë njëzëri Jo Skavicës dhe Po Dibrës.
Një grup djem dhe vajza dibrane pjesëmarrës në protestë ishin të veshur në bluza të bardha, që me vullnet e dëshirë nëpërmjet thirrjes së shkruar në gjoks të bluzave « Yes Dibrës! – No Skavicës! » kërkonin ta ndalin këtë projekt që sipas tyre përmbyt për jetë troje dhe një histori të tërë.
Protestës i priu gazetari atdhetar dhe patriot zoti Beqir Sina i cili në fjalën e tij theksoi fshatin Sinë,vendlindjen e krye/heroit tonë kombëtar Gjergj Kastrioti Skënderbeu, e cila rrezikon të mbulohet nën ujë bashkë me muzeun historik atje si dhe gjurmët historike të prejardhjes së heroit dhe simbolit tonë kombëtar të të gjitha kohërave.
“Ky mohim i dyfishtë i Dibrës një herë nga diktatura e cila e internoi familjen time dhe tani nēn pushtetin e mafies qeveritare që mbyt vendlindjen dhe 30 fshatra përreth është një rrezik serioz i mohimit të identitetit tonë kombëtar” – theksoi Beqir Sina në fjalën e tij .
Profesoreshë Ferzileta Gjika Vladi përmes një analize shkencore shpjegoi përpara protestuesve pse ky projekt është i dëmshëm dhe jo i duhur për ekoklimën e shekullit të 21.
Ajo foli edhe si ish – banore e territoreve qē rrezikohen nga përmbytja duke ndarë me pjesëmarrësit edhe emocionet por edhe refleksionet objektive mbi padrejtësinë që po u bëhet dibranëve.
Drejtuesi i organizatës ”Albanian Roots” zoti Marko Kepi ish kandidati për Këshilltar në Nju Jork, i bëri thirrje politikës dhe institucioneve përgjegjëse që ta bllokojnë zbatimin e këtij projekti që bie në kundërshtim me interesat lokale e kombëtare duke dhunuar pronën dhe demokracinë.
Mjaft mirë u prit edhe fjala e instrumentistit Ilmi Kacani i cili theksoi se humbjet kulturore që pëson Dibra nga përmbytja e kësaj zone prekin vlera kombëtare të kulturës tonë ku u përkundën artistë epikë dhe lirikë me zë e emër që prodhuan bilbilat e asaj zone por edhe Shqipërisë si Lirie Rasha, Caje Poleshi, Qerim Sula, Sherif Dervishi, Vera Laçi , Skënder Cala, etj .
Aktivistë të shumtë si Arif Mata, Jurgen Vladi u rreshtuan në krah të argumenteve që studiuesit e shumtë dibranë kanë artikuluar në botime e publikime se mbytja e Dibrës nuk i sjell dritë Dibrës dhe Shqipërisë, përkundrazi na zhduk nga «faqja e dheut» edhe identitetin tonë kombëtar e historik të Dibrës.
Emocionues dhe me tone të forta ishte fjala e zotit Ilir Spata, një tjetêr ish – banor i zonës që rrezikon të mbytet nga Skavica. Ai përmes një interpretimi të bukur solli vargje madhështore kushtuar asaj treve epike në realitet dhe në histori.
Nuk mund ti mungonte kësaj proteste mbështetja e komunitetit të Dibranëve të Dibrës tjetër, dhe konkretisht kryetari i Shoqatës Atdhetare Dibra zotit Dash Myftari i cili foli si dibran, por edhe si një qytetar me origjinë nga Dibra shqiptare pasi edhe origjina e tij është Kllobçishti e Shqipërisë .
Zoti Miftari tha se ky është rasti për ti kthyer nderin me nder Dibrës në prag të kësaj padrejtësie ndaj duhet ti themi jo Skavicës si dikur në mbrojtje të Radikës të përbashkuar.
Cezar Ndreu stërnipi i legjendës së historisë dibrane Elez Isufit foli edhe në emër të familjes së madhe Ndreu e ku nëpërmjet fjalëve të tij i emocionoi sërish pjesëmarrësit me evokimet e tij historike si thirrje për ti dalë zot të tashmes.
Peticioni i hartuar nga profesoresha e universiteti i Nju Jorkut Ferzileta Gjika – Vladi , e cila lexoi peticionin në gjuhën angleze çka do ti drejtohet Organizatës së Kombeve të Bashkuara për Mbrojtjen e lumenjve dhe Mjedisit.
Peticion ky që grupi organizator tha se ka për ta përcjellë në nivelet e tjera nëpër të cilat do të kalojë kjo protestë në Shqipëri si dhe në institucionet Evropiane .
Në fund tubimi u përshëndet nga iniciuesi dhe organizatori, zoti Agron Damzi i cili veçanërisht falënderoi pjesëmarrësit dhe organizatorët për prezencën dhe paralajmëroi etapa të tjera nëpër të cilat do të kalojë zëri i Dibranëve si zë i të drejtës që po dhunohet nga pushtetarët e sotëm vendimmarrës.
Tubimi u mbyll me këngën e «Jam Krenar që Jam Dibran» të këngëtarit të njohur dibran Haxhi Maqellara dhe thirrjet e njëzëshme tē pjesëmarrësve Po Dibrës, Jo Skavicës çka do të pasohet nga valë të reja reagimesh .
Protesta e 4 Nëntorit në Nju Jork, ishte pikënisja e një kthese të rëndësishme historike për Dibrën, që burim force e frymëzimi ka dinjitetin dhe krenarinë .
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
