Me rritjen e numrit të infeksioneve me COVID-19 në Melburn, është rritur ndjeshëm edhe numri i anëtarëve të komunitetit shqiptar që janë prekur nga kjo sëmundje. Udhëheqësit e shoqatave të ndryshme kanë hapur një fushatë ndërgjegjësimi për të gjithë komunitetin dhe për t’i ardhur në ndihmë personave të infektuar.

Pjesë e fushatës janë edhe sesione informative në platformën Zoom ku mjekë dhe specialistë të shëndetit u përgjigjen pyetjeve të pjesëmarrësve.

Kryetari i Shoqatës së Komunitetit Shqiptar Australian, Z. Sezar Jakupi, për emision në gjuhën shqipe në radion SBS tha se:  “Është vështirë të kemi të dhëna për një numër të saktë, flitet që infektimet janë më dhjetra por duket që këto javët e fundit janë rritur dhe mund te kenë kaluar në 200 apo 300 raste.

Ndërsa Kyetari i Shoqatës se Komunitetit Shqiptar Australian në Dandenong, Z. Riza Jaupi tha se momentalisht situata është pak e vështirë në komunitetin shqiptarë në Dandenong dhe numri i të prekurve nga COVID është mjaft i madh.

“Numrin e sakte momentalisht nuk e di, por janë shumë. Shpresoj që kjo do ti bëjë shqiptarët që të ndjekin rrugën e drejtë, rrugën e mjekësisë, të marrin këshillat e të gjithë atyre personave që e dinë të drejtën dhe e dinë mirësinë e kësaj vaksine”, tha ai.

Imami i Shoqërisë Shqiptare të Prespës, Dr. Bekim Hasani organizator i sesionit në zoom me mjekët tha: “Kemi kaluar telefonata te ndryshme, pyetje rreth virusit rreth vaksinave fatkeqësisht nuk kemi pasur ndonjë prononcim nga ndonjë komunitet shqiptar ose shoqate deri me tani. Vetëm këto dy tri ditët e fundit ka pasur reagime edhe unë jam shumë i gëzuar që tërë komunitetet dhe shoqatat fetare kanë dalë dhe me një prononcim ne lidhje me situatën e komunitetit shqiptarë në vend. Dhe kjo më ka shtyrë mua dhe disa mjekë të tjerë që të organizohemi. Pasi kemi pritur nga të tjerët dhe nuk ka ndodhur. Unë kam ftuar disa profesionistë, mjekë të fushave të ndryshme, mjekë të cilët janë të njohur edhe në komunitetin shqiptar këtu në Melburn dhe kemi organizuar një sesion nëpërmjet zoom ku të gjithë njerëzit  e interesuar kanë pasur mundësi të pyesin rreth vaksinës dhe çfarë përmban ajo, si dhe rreth situatës në komunitetin tonë. Fatkeqsisht janë shumë shqiptarët e prekur nga COVID, mund të them se kam dëgjuar që një shqiptar është në koma e shumë të tjerë në ventilatorë. Mirëpo ju e dini që ka njerëz në komunitetin tonë shqiptar që nuk tregojnë që janë infektuar  duke menduar që mjekët mund ti shohin ndryshe pasi ata janë të infektuar nga ky virus’.

Nga Majlinda Lulo – SBS Radio

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.