“I ricordi di un medico” (Kujtimet e një mjeku), pas vlerësimit më të fundit si një nga 200 librat më të bukur në Itali në Konkursin Kombëtar Letrar “Tre colori” në Lenola (Latina), “udhëton” në Torino si pjesë e Edicionit të 33 të Panairit të Librit, që do të qëndrojë hapur nga datat 14 -18 tetor 2021. Kjo vepër që mban autorësinë e shkrimtares Irma Kurti dhe babait të saj Hasan Kurti mbështetet në ditarin me shënime të këtij të fundit; ajo tregon historinë e një fëmije të varfër jetim që përshkon një rrugëtim të gjatë e të vështirë për të ndjekur ëndrrën e tij për t’u bërë mjek.

“Ka qenë një periudhë e vështirë për arsye të pandemisë – thotë Kurti,  – por fakti që Salloni i librit këto ditë i ka hapur dyert për mijëra vizitorë e dashamirës të librit dhe që libri im është tashmë pjesë e tij, është një gëzim dhe emocion i papërshkruar. Ky libër më ka bërë shoqëri gjatë muajve të vështirë të izolimit prej pandemisë dhe është jo vetëm homazh për babain tim, po edhe një sfidë”.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.