Italia voton këtë fundjavë për zgjedhjet vendore në 1157 komuna. Mbi 12 milionë italianë janë thirrur të votojnë për të zgjedhur kryetarë Bashkie e këshilltarët e rinj bashkiakë.
Në këto zgjedhje të shumtë janë shqiptarët që kanë hedhur kandidaturën e tyre për të qenë pjesë aktive e politikave vendore në komunën ku banojnë.
Silvana Xheneti kandidon në Bashkinë e Roseto degli Abruzzi. Ajo është nënë e dy fëmijëve. E vendosur në Itali në fillim të viteve ’90 ajo i përket ati brezi që njohën cdo vështirësi e luftuan për cdo mundësi.
Në Itali, Silvana Xheneti mundi të realizoj ëndrrën e saj për të mbaruar Universitetin në drejtësi, e drejtë kjo e mohuar prej 1982, në vendlindje Shqipëri, me arsyen se familja e saj ishte armike e popullit. Në një intervistë për “Diaspora Shqiptare” Xheneti tregon arsyen që e shtyu të jetë pjesë e zgjedhjeve.
Prej 25 vitesh Silvana Xheneti është profesioniste e lirë në Itali, eksperte emigracioni, mediatore kulture e themeluese e dy shoqatave “Iris” e “Drita”.
Silvana kandidoni si këshilltare bashkiake në komunën Roseto degli Abruzzi, në provincën e Teramos, në rajonin e Abruzzo-s,me litën civile që mbështet Partinë Demokratike. Pse kjo thirrje për t’u angazhuar në politikë?
Kryetari aktual i Bashkisë së Roseto degli Abruzzi, që është një komunë e vogël buzë Adriatikut më ftoi të isha pjesë e listave të kandidaturës qysh ne muajin gusht edhe sigurisht mëdyshjet e mija për angazhim politik ishin të mëdha, por pas kontaktesh të panumërta vendosa po. Mendoj që kanë cmuar tek figura ime formimin akademik në Itali, formimin kulturor, eksperiencën e gjatë në administratën publike të Italisë, si mediatore kulturore (e para në Regione Abruzzo qysh ne 1996) si profesioniste e lirë, eksperte në politikat e emigracionit dhe kordinatore në projekte europiane.
Angazhimi im ndër vite në politikat shoqërore, migratore dhe si pikë referimi për gjithë komunitetin shqiptar është vlersuar mjaft.
Keni emigruar në vitet ’90, por nuk hoqët dorë nga ëndrra për të mbaruar Universitetin në drejtësi. Sa e vështirë ishte për ju të arrinit atë që dëshironit?
Kam emigruar në vitin 1992, kur sapo kisha nisur edhe Fakultetin e Drejtësisë në Tiranë, që edhe pse me mesatare 9,8 më ishte mohuar e drejta e studimit për arsye politike.
Edhe pse me djalin e sapolindur e mbarova Universitetin në Tiranë, por në Itali nuk njiheshin diplomat shqiptare edhe unë nuk mund të punoja në profilin tim pa titull e prandaj atë ëndërr që nuk e realizova dot e re, vendosa ta ndërmarr kur isha mama me 2 fëmijë.
Rrugëtim impenjativ ai i formimit akademik në Itali, por mbështetja e tim shoqi ishte e madhe, organizimi maksimal i kohes si grua e vendosur në objektivat që i kisha vënë vetes e profesioniste, eksperte CTU e Gjykatës qysh nga viti 1995, më ndihmoi të arrija në fund.
Ju jeni gjithashtu nismëtarja e krijimit të shkollës shqipe “Drita”, që prej katër vitesh mikpret fëmijë shqiptarë në mësimin e gjuhës shqipe e të historisë shqiptare. Në Itali jetojnë shumë shqiptarë, si mendoni sa për qind e tyre kontribojnë që fëmijët të mësojnë gjuhën shqipe?
Shkolla “Drita” ka filluar shumë vite më parë në Martinsicuro dhe rifilloi pikërisht në qytetin e Roseto degli Abruzzi me mbështetjen e madhe të kryetarit Sabatino di Girolamo e kjo ishte edhe një nga arsyet që përcaktoi kandidaturën time, sepse në eventet për hir të Pavarsisë Shqipërisë këtu në Itali edhe projektet me Shoqatën DRITA që unë kryesoj qysh nga viti 2005, kemi pasur përkrahjen e Komunës. Shoqata “Drita” është e regjistruar prej 10 vjetesh tek Albo delle Associazioni Imm.al Ministria e punëve dhe cështjeve sociale.
Unë duke qene e brezit parë të emigrantëve i kam përjetuar edhe jam angazhuar totalisht në proceset e identifikimit, projeksionit edhe eskluzionit të origjinës për t’u paraqitur ndryshe.
Kjo fazë është tejkaluar, por përqindja e prindërve të interesuar është akoma tejet e ulët, sepse mungon informazioni, kultura, sensibilizimi edhe mënyra e duhur e organizimit të mësimit shqip në Diasporë
Në vendin ku jetoni ka shumë shqiptarë? Mendoni se do e ken mbështetjen e tyre?
Unë nuk jetoj në Roseto, por punoj e angazhohem prej shumë vitesh aty. Komuniteti shqiptar është relativisht i madh aty e mendoj se me profesionalizmin e humanizmin tim të jem pikë referimi për gjithë territorin.
Në tri pika kryesore për cfarë do e ngrini zërin tuaj nëse fitoni në zgjedhjet e fundjavës?
Është hera 1e parë që në këtë komunë kandidon një shqiptare, që do të përpiqet të sjell fuqishëm në Këshillin Bashkiak Roseto degli Abruzzi zërin jo vetëm të qytetarëve të rinj shqiptarë, por të gjithë emigrantëve e qytetarëve italianë aty duke pasur në fokus jo vetëm gratë e të rinjtë e brezit dytë në punësim e formim, por duke përkrahur e favorizuar marreveshjet për pensionet e qytetarëve shqiptarë që pas 30 vjetësh qëndrim në Itali është tejet i mprehtë si problem. Do të jenë në fokusin tim edhe sipërmarresit shqiptarë në politikat komunale e kombëtare e sidomos për të vegjëlit që janë lindur e rritur këtu projektet për forcimin e identitetit kombëtar./Diasporashqiptare.al/
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
