Nuk e ka fshehur asnjëherë se të parët e tij janë nga Shqipëria. Pavarësisht historisë së dhimbshme të fisit të tij të internuar pas arratisjes së gjyshërve në Amerikë, mjeku Filip Caushaj një nga doktorët më të mirë në SHBA, ka gjetur rrënjët e të parëve në Shqipëri.

I ati i rriti duke mësuar gjuhën shqipe, por i kish thënë të mos shkelte kurrë në këtë vend për shkak të atij sistemi.

Fitues i titullit “Top doctor” në SHBA, rrëfen historinë e familjes tij për MCN: “Njerëzit e mi ishin në kampe internimi dhe kanë vuajtur në ato vite. Mësuesit e mi në fëmijëri kanë qenë, Mithat Frashëri, Hasan Tosti, Ali Këlcyra etj. Këta njerëz më mësuan mua alfabetin shqiptar. Mbaj mend se më mësonin se ata njerëz që donin të “hanin” kufinjtë shqiptarë ishin armiqtë tanë.”

Caushaj rrjedh nga dy prindër shqiptar, i ati nga Tepelena dhe e ëma nga Fieri. Edhe pse i lindur në SHBA ai gjithmonë kishte brengën për të ardhur në Shqipëri.

“Babai më la amanet të mos kthehem në Shqipëri, por Shqipëria ka ndryshuar dhe unë bëra mirë që erdha për të dalë nga kornizat e së kaluarës. Gjithë jetën time kam thënë jam shqiptar, sepse ata njerëz që mohojnë origjinën nuk mund të bëhen kurrë dikushi.”

Ish-Presidenti i Republikës, Bujar Nishani ka dekoruar në një ceremoni të veçantë Prof. Dr Philip Çaushaj më datën 15/09/2016, me Dekoratën “Nderi i Kombit”, për promovimin e vlerave të shqiptarëve të suksesshëm, si Ambasador i përfaqësimit të atyre që kanë shkëlqyer si mjekë profesionistë dhe humanistë në botë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.